Россиянинг «Спартак» клуби бош директори Шамил Газизов «Уфа»нинг 19 ёшли ўзбекистонлик ярим ҳимоячиси Остон Ўруновга жамоанинг қизиқиш билдираётгани ҳақидаги хабарларга ўз муносабатини билдирди.
«Мен унинг имкониятларини яхши биламан, лекин бирон бир нарса ҳақида гапиришга ҳали эрта. Жамоанинг чизиқларини кучайтириш лозим. У қандай футболчи бўлади, ҳозирча яхшиси айтмайман. Позициялар ҳақида гапиришга ҳали эрта. Кимнидир топсак, эълон қиламиз.
Жамоа ҳали ёш, ғалаба таъмини ҳис қилиши керак. Бироз такомиллаштириш ҳам зарур. Тажрибали ёки ёш футболчиларни сотиб олишни клуб билан биргаликда ҳал қиламиз», — дейди Газизов.
Қайд этиш жоиз, Шамил Газизов «Спартак»да иш бошлагунига қадар «Уфа»да фаолият юритган.
Аввалроқ Остон Ўруновга Россия Премьер Лигасининг бир йўла тўрт клуби — «Зенит», «Локомотив», «Краснодар» ва «Спартак» клублари қизиқиш билдираётгани тўғрисида хабар берилганди.
«Уфа» Остон Ўруновни шу йилнинг февраль ойида ўз сафига қўшиб олган. Ўрунов Россия Премьер Лигасида 9 ўйинда майдонга тушиб, 2 та сариқ карточка олди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)