Бир марта қувватланиш орқали 500 километр: Nissan’нинг биринчи электрокроссовери тақдим этилди

Nissan компанияси ўзининг илк электрокроссоверининг товар версиясини намойиш этди. Ariya модели 20 та ёруғлик диодга эга янги логотип, бошқарилувчи марказий консол, интеллектуал шахсий ёрдамчи ва e-4orce тўлиқ электр узатмасига эга бўлди, деб ёзади Motor.

Nissan Ariya Европа бозори учун бешта версияда тақдим этилади. Модификациясига қараб электрокроссоверга 63 ёки 87 киловатт-соатли, бир ёки иккита электромотор ўрнатилади. Бир марта қувватланиш орқали машиналар 360 дан 500 километргача йўл босиши мумкин.

Олд узатмали Ariya моделига 217 ёки 242 от кучига эга, тўлиқ узатмалига эса — 278 ёки 305 от кучига эга агрегат ўрнатилади. Электромоторларнинг e-4orce Performance билан биргаликдаги умумий қуввати 394 от кучига етади. Сериядаги кичик электрокар 100 км/соат тезликка 7,5 сонияда, каттаси эса — 5,1 сонияда эшишади. Олд узатмали модификацияли электрокроссовернинг максимал тезлиги соатига 160 километрга, тўлиқ узатмалиники эса — 200 км/соатга тенг.

Ariya дизайни 2019 йилда Токио автосалонида тақдим этилган концепт-карнинг кўринишини такрорлайди. Серияли электрокарга 20 миллиметрли мини-прожекторларга эга фаралар, трапецияли радиатор панжараси ва ён томонларидаги қирқимлар «мерос қолган».

Компаниядагилар Ariya салонини кенг «ҳашаматли меҳмонхона лайнери» билан таққосламоқда. Иқлим-назорат тизими капот остидан — анъанавий моделларда двигатель ўрнатилган жойдан ўрин олган. Аккумулятор батареяси эса асосий шассига жойлаштирилгани сабаб, пол теккислигича қолган. Кроссовернинг яна бир ўзига хос жиҳати — Zero Gravity ўриндиқлари. Бундан ташқари, салон ичидан иккита 12,3 дюймли экран ўрин олган: биринчиси қурилмалар панели вазифасини бажарса, иккинчиси мультимедиа тизимини бошқаришга жавоб беради.

Яқин ойларда Nissan компанияси Европа бозори учун мўлжалланган Ariya’нинг нархини маълум қилишга ваъда берган.