Қарши шаҳрининг марказий кўчалари ҳамда автомобиллар тирбанд бўладиган йўлларга шовқин чиқарувчи чизиқлар чизиб чиқилди. Бу ҳақда «Дарё»га хабар берган Йўл ҳаракати хавфсизлиги Қарши шаҳар бўлими бошлиғи Аҳрор Усмоновнинг сўзига кўра, бу ҳаракат хавфсизлигини таъминлаш мақсадида амалга оширилган.
«Ички ишлар вазирлиги ЙҲХББ топшириғи билан шаҳар ҳудудида йўл транспорт ходисаларининг олдини олиш мақсадида шаҳар ҳудудидан ўтувчи халқаро аҳамиятга эга бўлган йўлларда ва транспорт оқими кўп бўлган кўчалардаги хавфли бурилишларда шовқин чиқарувчи чизиқлар чизилди», — дейди Аҳрор Усмонов.
Таъкидланишича, бу каби шовқин чизиқлар синов тариқасида Қарши шаҳри, Қарши, Ғузор, Косон, Чироқчи ва Қамаши туманидаги марказий кўчаларга чизиб чиқилган бўлиб, ўзини оқласа бошқа туман йўлларида ҳам чизилади.
Эслатиб ўтамиз, Ўзбекистонда йил бошидан буён содир этилган ЙТҲларнинг қарийб 650 таси ўлим билан якунланган. Йўл-транспорт ҳодисаларининг 1154 таси (48,3 фоизи) пиёдалар, 383 таси (16 фоизи) болалар ва 101 таси (4,2 фоизи) велосипедчилар иштирокида содир этилган.
Изоҳ (0)