Тошкент шаҳрида 2021 йилдан бошлаб электромобилларни қувватлаш станцияларини қуриш режалаштирилмоқда. Бу Президентнинг 10 июлдаги «Иқтисодиётнинг энергия самарадорлигини ошириш ва мавжуд ресурсларни жалб этиш орқали иқтисодиёт тармоқларининг ёқилғи-энергетика маҳсулотларига қарамлигини камайтиришга доир қўшимча чора-тадбирлар тўғрисида»ги қарорида белгиланган.
Мазкур қарорда уни амалга ошириш бўйича «йўл харитаси» ва бир қатор аниқ чора-тадбирлар белгиланган. Жумладан, қарорда электромобиллар учун инфратузилмани яратиш кўзда тутилган. Қарорга кўра, 2020 йилнинг сентябрь ойида хорижий тажрибани ўрганиш асосида таҳлилий материаллар тайёрланади.
Шундан сўнг станцияларни қуриш учун жойлар ўрганилади, 2021 йилнинг январь ойида эса Тошкент шаҳрида Халқаро электротехника комиссиясининг 61851−1-Моде 4 стандартига мос келадиган дастлабки иккита электромобилларни қувватлаш станциясини ўрнатиш режалаштирилмоқда. Станцияларни қуриш ишлари «Ўзбекнефтегаз» компанияси маблағлари ҳисобидан амалга оширилиши кутилмоқда.
Аввалроқ Тошкентлик тадбиркор пойтахт такси хизмати учун Хитойдан 500 та электромобил сотиб олгани ҳақида хабар берилганди.
Шунингдек, 2019 йилнинг сентябридан бошлаб Беларуснинг Vitovt Electro E420 электробуси Тошкент кўчалари бўйлаб қатнай бошлаганди. Мазкур транспорт воситаси 450 минг долларга харид қилинган эди. Шу йилнинг март ойида эса Хитойнинг Yutong электробуси пойтахтда ҳаракатлана бошлагани маълум бўлганди.
Маълумот учун, Ўзбекистонда электромобиллар ишлаб чиқаришни йўлга қўйиш борасида ҳаракатлар аллақачон бошланган. Қўқонда 2023 йилдан бошлаб электромобил ишлаб чиқарилиши режаси борасида аввал хабар берилган эди. Хонободда (Андижон вилояти) ҳам электромобил ишлаб чиқарилиши йўлга қўйилиши ҳақида хабарлар мавжуд. Инновацион ривожланиш вазирлиги эса Қозоғистон билан ҳамкорликда электромобил ишлаб чиқариш режаларини муҳокама қилганди.
Изоҳ (0)