«Машъал» клуби катта мураббийи Дилявер Ваниев Coca-Cola Суперлига 9-тури доирасида «Локомотив»га қарши кечган ўйиндан (1:0) сўнг ўз фикрларини билдирди.
«Ҳозирги ҳолатимни тушунмаслигингиз табиий. Бизга ғалаба жуда зарур эди. Ўйиндан олдин бироз босим бор эди. Анча вақтдан бери ғалаба қозона олмаётган эдик. Йигитлардан ўз ўйинларини кўрсатишларини илтимос қилгандик. Режадан ташқарига чиқмаган ҳолда ҳаракат қилишни буюргандик. Ғалаба билан шогирдларимни ва мухлисларни табриклайман.
«Машъал» сафарда «Локомотив»ни охирги маротаба мағлуб этганида мен футболчи сифатида Олий Лигада тўп тепаётган эдим (сўнгги бор Муборак клуби «Локо»ни 2010 йил 26 августда сафар ўйинида мағлуб этган — Изоҳ «Дарё»). Ўша пайтлар «Локомотив» ҳозиргидек эмасди. Кейин улар молиявий томондан анча барқарор клубга айланди. Уч мавсум давомида чемпионликни ҳеч кимга бермади. Уларни ўйин фалсафасини ва услубини олдиндан билардим. Тўпни олиб қўяди ва бўш ҳудудлар орқали ҳужумларни ривожлантиради. Ҳозир футболда ким кўпроқ тўпни назорат қилса, вазиятлардан фойдаланса ўша жамоа ғолиб чиқмоқда.
Энди барчасини унутиб Муборакка йўл оламиз ва навбатдаги ўйинга тайёргарлик кўрамиз. Ёзги трансферлар вақтида юқори савиядаги футболчини олиб келиш қийин масала. Лекин бу борада ишлар давом этади ва тўхтамайди.
Легионерлар билан мулоқот қилишда муаммога учрамаяпмиз. Элла Кеннининг турмуш ўртоғи Украинадан. Шу боис у билан рус тилида мулоқот қиламиз. Ушбу футболчи орқали Ифеани Ифеани билан гаплашамиз.
Тўртта ўйинда гол ура олмаётганимиз жамоага жуда катта босим қилаётганди. Шахсан ўзимга ёш мураббий сифатида бу жараённи бошдан ўтказиш осон бўлмади. Йигитларга ҳам айтдим. Футболда гол уриш керак, гол урмасангиз ғалаба қозона олмайсиз», — дея Ваниев сўзларини келтирмоқда «Championat.asia».
Ушбу ғалабадан сўнг муборакликлар очколарини 9 тага етказиб олди ва 10-ўринга кўтарилди. 10-турда жамоа «Андижон»ни меҳмон қилади.
Мавзуга доир: Андрей Фёдоров «Локомотив»нинг навбатдаги мағлубияти ҳақида: «Жуда ёмон ўйнадик. Бу нима билан боғлиқ эканлигини билмайман».
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)