Тошкент шаҳрининг Олмазор туманида яшовчи коронавирусга чалинган эр-хотин 68 ёшли К.А ва 67 ёшли С.А. вафот этди. Бу ҳақда соғлиқни сақлаш вазирлиги хабар қилган.
Хабарда қайд этилишича, мазкур туманда яшовчи 68 ёшли К.А. (эркак) ва унинг турмуш ўртоғи 67 ёшли С.А. тана ҳарорати 38 даражагача кўтарилиши, умумий ҳолсизлик сабабли 2020 йилнинг 5 июль куни тез тиббий ёрдам машинасида Республика шошилинч тиббий ёрдам илмий марказига олиб борилган. Беморлардан COVID-19 инфекциясига намуна олинган ва касаллик тасдиқланган.
Уларга ихтисослашган тиббий ёрдам кўрсатиш мақсадида шаҳар 1-сонли клиник шифохонасига олиб келиниб, реанимация бўлимига ётқизилган. Ҳар икки беморда ўткир нафас етишмовчилиги кузатилгани сабабли сунъий нафас олдириш аппаратига олинган. Уларга COVID-19 инфекцияси оғир кечиши, икки томонлама пневмония, ўткир нафас ва юрак-қон томир етишмовчилиги ташхиси қўйилган.
Шунингдек, юрак ишемик касаллиги, стенокардияси, гипертония, артериал гипертензия каби ҳамроҳ касалликлар билан ҳам оғриган.
Шифохонада беморларнинг даволаниши давомида тиббиёт ходимлари томонидан консилиумлар ўтказилган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан эр-хотин беморларнинг аҳволи кескин оғирлашган, улар ўткир нафас ва юрак-қон томир етишмовчилигидан вафот этган. ССВ ахборотида беморларнинг қачон вафот этганига аниқлик киритилмаган.
Эр-хотин беморлар Ўзбекистонда COVID-19 инфекцияси асоратлари оқибатида вафот этган 66 ва 67-қурбонларга айланди. Аввал 29 июнда Жиззах вилояти Шароф Рашидов туманида яшовчи коронавирус инфекциясига чалинган 72 ёшли отахон Қ.Р., бир кундан кейин отахоннинг турмуш ўртоғи 70 ёшли онахон Ф.О. ўткир миокард инфаркти, юрак-қон томир ва нафас етишмовчилигидан вафот этганди. 14 июль куни Тошкентда коронавирусга чалиниб, 10 кун уйида даволанган 61 ёшли эркак, Қашқадарёда коронавирусга чалинган 56 ёшли эркакнинг вафот этгани ҳақида хабарлар берилганди.
Изоҳ (0)