Андижон шаҳрида фуқаронинг қийноққа солиниши сабаб ишдан олинган ИИО ФМБ бошлиғи ўрнига янги раҳбар тайинланди

Ички ишлар вазирининг шахсий таркиб бўйича буйруғи билан лавозим тайинловлари амалга оширилди. Бу ҳақда вазирлик ахборот хизмати хабар берган.

Ўзбекистоннинг тўрт ҳудудида янги ИИБ бошлиқлари иш бошлайди, хусусан, Андижон шаҳри бўйича ички ишлар органлари фаолиятини мувофиқлаштириш бошқармасига янги бошлиқ тайинланган. Аввалги бошлиқ Андижонда фуқаронинг ички ишлар органлари ходимлари томонидан қийноққа солиниши оқибатида касалхонада вафот этгани туфайли ишдан олинганди.

Хабарга кўра, Андижон вилоятининг Андижон шаҳри бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи вазифасини бажарувчиси лавозимига подполковник Шоҳрухбек Назиров тайинланган. У тайинловга қадар Андижон вилояти ИИБ Жиноят қидирув бошқармаси бошлиғи лавозимида хизмат қилган.

Шунингдек, Қорақалпоғистоннинг Элликқалъа, Наманган вилоятининг Чортоқ, Самарқанд вилоятининг Каттақўрғон ва Фарғона вилаётининг Бувайда туманларига ҳам ИИБнинг янги бошлиқлари тайинланган.

Қорақалпоғистон ИИВ Тергов бошқармаси бошлиғи ўринбосари лавозимида хизмат қилган подполковник Усманжан Ситмуратов Элликқалъа тумани ички ишлар бўлими бошлиғи лавозимига тайинланди. Мазкур туманда ИИБ бошлиғи лавозимида ишлаган подполковник Бахтжан Избасаров 2020 йилнинг май ойида Қорақалпоғистон ички ишлар вазирининг жамоат тартибини сақлаш бўйича ўринбосари лавозимига тайинланганди.

Подполковник Отабек Жабборов Наманган вилояти Чортоқ тумани ички ишлар бўлими бошлиғи лавозимига тайинланди. Тайинловга қадар Жабборов Наманган вилояти ИИБ Терроризм ва экстремизмга қарши курашиш бошқармаси бошлиғи ўринбосари — терроризм ва экстремизмга қарши курашиш бўлими бошлиғи лавозимида хизмат қилган.

Чортоқ тумани ИИБнинг аввалги бошлиғи Собитхон Абдурайимов 8 июль куни президент Шавкат Мирзиёев ўтказган видеоселекторда ишдан олинган.

Подполковник Хондамир Умаров Самарқанд вилояти Каттақўрғон шаҳар ички ишлар бўлими бошлиғи лавозимига тайинланди. Умаров Самарқанд вилояти ИИБ Йўл ҳаракати хавфсизлиги бошқармаси йўл-патруль хизмати батальони командири ўринбосари — штаб бошлиғи лавозимида ишлаб келаётганди.

У 2019 йил мартидан буён Каттақўрғон шаҳар ИИБ бошлиғи лавозимида ишлаб келаётган майор Отабек Муҳаммадиевнинг ўрнига мазкур вазифага тайинланди.

Подполковник Рустамжон Ҳайитов Фарғона вилояти Бувайда тумани ички ишлар бўлими бошлиғи лавозимига тайинланди. Тайинловга қадар Ҳайитов Фарғона вилояти ИИБ Жиноят қидирув бошқармаси қидирув ишларини ташкил этиш бўлими бошлиғи лавозимида хизмат қилган.