Ўзбекистонга 2020 йилнинг биринчи ярмида хориждан жами 2,4 млрд долларлик пул жўнатмалари юборилган

Марказий банк 2020 йилнинг январь—июнь ойлари давомида Ўзбекистонга хориждан юборилган халқаро пул ўтказмалари ва 2019 йилнинг мос даври билан солиштиргандаги фарқли жиҳатлар ҳақида маълумот берди.

Унга кўра, Ўзбекистонга келиб тушган трансчегаравий пул ўтказмалари ҳажми 2,4 миллиард АҚШ долларини ташкил этиб, 2019 йилнинг мос даврига нисбатан 156 миллион долларга ёки 6 фоизга камайган.

Чет элга юборилган трансчегаравий пул ўтказмалари миқдори 427 миллион долларга етиб, 2019 йилнинг мос даврига нисбатан 40 миллион доллар ёки 9 фоизга қисқарган.

Трансчегаравий пул ўтказмалари бўйича ижобий сальдо 2 миллиард долларга етиб, ўтган йилнинг мос даврига нисбатан 116 миллион долларга (ёки 5 фоизга) камайган.

Аввал Ўзбекистонда нақд пул тушумларининг ҳажми коронавирус эпидемиясидан аввалги даражасини тиклаётгани, олтин ва бошқа қимматбаҳо металлардан тайёрланган ёмбиларни Марказий банк шохобчаларидан сотиб олиш имконияти яратилгани ҳақида хабарлар берилганди.