Самарқандда 2020 йилнинг февраль ойида ўз жонига қасд қилгани айтилган 69 ёшли аёл А.У. қариндошлари томонидан ҳуқуқни муҳофаза қилувчи органларга хабар берилмасдан кўмиб юборилганлиги шубҳали кўрингани учун унинг қотиллик қурбони бўлиши мумкинлиги сабабли жиноят иши қўзғатилгани хабар берилганди.
Бош прокуратура матбуот хизматининг «Дарё»га маълум қилишича, ҳақиқатни аниқлаш учун ўтказилган бир қатор тергов ҳаракатлари якунига етган.
Тергов маълумотларига кўра, аёлнинг ўз жонига қасд қилиб вафот этганлиги, унинг яқин қариндошлари ҳуқуқни муҳофаза қилувчи органларга хабар бермасдан, мурдани Пастдарғом туманидаги «Олтин қаҳрамон» маҳалласида жойлашган «Дўстлик» қабристонига кўмиб юборишганлиги ҳақида тезкор хабар Пастдарғом туман прокуратурасига 7 февраль куни соат 20:50 ларда келиб тушган.
Мазкур тезкор хабарга асосан Пастдарғом туман прокуратураси томонидан терговга қадар текширув ҳаракатлари олиб борилиб, марҳума А.У.нинг мурдаси эксгумация қилиниб, ушбу ҳолатларга тергов йўли билан аниқлик киритишлик мақсадида 10 февралда Жиноят кодексининг 97-моддаси (Қасддан одам ўлдириш) 1-қисми билан жиноят иши қўзғатилган.
Тергов ҳаракатлари давомида экспертиза хулосалари ва тўпланган ҳужжатларга кўра, А.У.нинг қотиллик қурбони бўлганлигини тасдиқловчи далиллар мавжуд эмаслиги, у бир неча йиллардан буён касалманд бўлиб тўшакка ётиб қолганлиги ва мустақил ўзини бошқара олмасдан бошқаларнинг кўмагига муҳтож бўлиб қолганлиги аниқланган.
Тергов давомида тўпланган далиллар А.У. ўз жонига қасд қилганлигидан далолат берганлиги боис, 17 март куни Жиноят процессуал кодексининг 83-моддаси (Эбилитация учун асослар) 2-бандига асосан жиноят ишини тугатиш тўғрисида қарор қабул қилинган.
Изоҳ (0)