Сурхондарёда фарзандини қонуний йўл билан бошқа аёлга беришдан бош тортиб, уни сотмоқчи бўлган аёл ушланди

Сурхондарё вилояти Қумқўрғон туманида дастлаб фарзандини бошқа аёлга суд орқали беришга рози бўлган, бироқ бу фикридан қайтиб, боласини сотмоқчи бўлган аёл қўлга олинди. Бу ҳақда Тергов департаменти хабар берди.

Маълум қилинишича, 2020 йилнинг апрель ойидаги Фуқаролик ишлари бўйича Қумқўрғон туманлараро судининг йиғилишида Жарқўрғонда яшовчи 28 ёшли Ф.Н. қиз фарзандини Қумқўрғон туманида яшовчи 35 ёшли Ю.Т.га суд орқали фарзандликка беришга рози бўлган. Ф.Н. туғруқ давомида кетган дори-дармон ва бошқа сарф-харажатларига деб 1,7 миллион сўм пулларни олиб, Ю.Т.га фарзандликка бериш учун барча ҳужжатларни тўплаб суд залига борганда фикридан қайтиб, фарзандини бермаслигини билдирган.

Орадан бир неча кун ўтиб, Ф.Н. телефон орқали ва бир неча маротаба Ю.Т.нинг уйига келиб, қиз чақалоғини сотиш учун Ю.Т.дан 10 миллион сўм талаб қилган. Шундан сўнг, Ю.Т. ИИБга ариза билан мурожаат қилган.

Мазкур ариза асосида ИИБ ходимлари томонидан 2020 йилнинг 3 июль куни Қумқўрғон туман «Оқсой» маҳалласи ҳудудида жойлашган Ёшлар хиёбони ҳовлисида ўтказилган тезкор тадбирда Ф.Н. қиз чақалоғи учун Ю.Т.дан талаб қилган 10 миллион сўмни олган вақтида ашёвий далиллар билан ушланган.

Мазкур ҳолат юзасидан Қумқўрғон тумани ИИБ ҳузуридаги Тергов бўлинмаси томонидан Жиноят кодексининг 135-моддаси 3-қисми «а» банди (Одам савдоси) билан жиноят иши қўзғатилган, ҳозирги кунда дастлабки тергов ҳаракатлари олиб борилмоқда.

Аввал Қорақалпоғистонда 13 ёшли фарзандини 15 минг долларга пуллаётган аёл қўлга олингани, Хоразмда 2 ёшли фарзандини 7700 долларга сотмоқчи бўлган аёл қўлга тушгани ҳамда Навоийда 3 ойлик боласини 3 хонали уйга алмаштираётган аёл ва унинг отаси жиноят устида ушлангани ҳақида хабарлар берилган эди.

Эслатиб ўтамиз, Сирдарё вилоятининг Гулистон шаҳрида 23 июнь куни 2020 йилнинг май ойида туғилган чақалоқни 18 минг долларга сотмоқчи бўлган аёллар қўлга олинганди. Навоийда 23 кунлик чақалоғини 3 миллион сўмга сотмоқчи бўлган аёлга жиноий иш очилганди.

Аввалроқ Қорақалпоғистонда 13 ёшли фарзандини 15 минг долларга пуллаётган аёл қўлга олингани, Хоразмда 2 ёшли фарзандини 7700 долларга сотмоқчи бўлган аёл қўлга тушгани ҳамда Навоийда 3 ойлик боласини 3 хонали уйга алмаштираётган аёл ва унинг отаси жиноят устида ушлангани ҳақида хабарлар берилган эди.