«Дарё»ни Telegram’да ўқинг! Join!
17:32, 13.07.2020 18352

Замонавий турмуш тарзида энг кўп кузатиладиган 5 зарарли одат

Техника ва ривожланиш ҳаёт даражаси яхшиланишига катта ҳисса қўшгани билан, инсонлар турмуш тарзига ҳам салбий таъсир ўтказмай қолмайди. Табиий маҳсулотлар ўрнига сунъий экстракт ва бўёқлар қўшилган таомларни ейиш, ҳаракатсизлик, компьютер қаршисида соатлаб ўтириб, кейин бошқалардан алам олиш ҳолатлари бугунги кун учун хос бўлиб қолган. Қуйида энг кўп кузатиладиган зарарли одатлар нималардан иборат эканига тўхталамиз.

Фото: The National

Кўп ўтириш

Техника ҳамда замонавий касблар сабаб ҳам бугунги кунга келиб керагидан кўп ўтириш, кам ҳаракатлилик кўп кузатилади. Спорт ва жисмоний машғулотлар билан шуғулланишга эса вақт ажратилмайди. Кўп ўтириш нафақат вазн тўпланиши, иммунитет тушиши, балки юрак-қон томир касалликларига ҳам сабабчи бўлади.

Тўйиб ухламаслик

Стресс ва асаббузарлик уйқуга ҳам ўз таъсирини кўрсатади. Бунинг оқибатида уйқуга кетиш қийин бўлади, уйқу давомида безовталик кузатилади, тонгда эса уйқудан туриш осон бўлмайди. Уйқунинг етарли бўлмаслиги эса кун бўйи лоқайд, бўшашиб юришга, ҳеч нарсани истамаслик ва қизиқмасликка олиб келади. Айтилавериб сийқаси чиқиб кетган бўлса ҳам зарурлиги учун таъкидлашдан чарчалмайдиган тавсия: 7-8 соатдан кам ҳам, кўп ҳам ухламанг.

Шамоллашни ҳам антибиотик даволаш

Антибиотиклар иммунитетни тушириб юбориш хусусиятига эга эканидан хабарингиз борми? Йўқ бўлса билиб олинг. Шамоллашнинг енгил формасида ҳам антибиотик дори воситасини қабул қилишга ошиқманг. Организмнинг курашишига қўйиб беринг, лекин ташлаб қўйманг. Тоза ҳаводан тўйиб нафас олинг, кўп суюқлик истеъмол қилинг, витамин ва минералларга бой салат ва таомлар истеъмол қилинг. Унутманг, оддий шамоллашда ҳам антибиотик қабул қилавериш оқибатида организм кўникиб қолиб, кейинчалик таъсир қилмайдиган ва ундан-да дозаси кучли дори воситаси қабул қилишга тўғри келиши мумкин.

Асабийлашиш

Асаббузарликдан қочиб бўлмаслигини инкор этмаган ҳолда ўзингизни чалғитиш, кайфиятни кўтарадиган севимли машғулотлар билан шуғулланиш тавсия қилинади. Қолаверса, муаммо юзага келганда бирламчи ва иккиламчига, муҳим ва номуҳимга ажратиб, вазиятга баҳо беринг. Сизнинг соғлиғингиз, саломатлигингиз кетишига арзийдиган даражада муҳимми мавжуд муаммо?

Кўп ширинлик истеъмол қилиш

Ширинлик кайфиятга яхши таъсир қилади, лекин саломатликка эмас. Сиз истеъмол қиладиган кетчуп, конфет, печенье углеводларнинг кони экани уларнинг меъёрдан ортиқ истеъмоли вазн тўплаш, қон айланишининг қийинлашиши ва бошқа жиддий касалликларга сабабчи бўлишини унутманг, азиз ўқувчи. Ўзингизни назорат қилиш орқали нафақат саломатлигингиз, балки кайфиятингиз яхшиланиб, натижада ҳаётдан мамнуниятни ҳис эта бошлайсиз.

Изоҳ қолдиришдан аввал, қоидалар билан танишиб олинг: http://dy.uz/sBU7c