Польшанинг амалдаги президенти Анжей Дуда президентлик сайловларининг иккинчи турида 51,21 фоиз овоз тўплади. Бу ҳақда Польша Давлат сайлов комиссияси 99 фоиз бюллетенларни ҳисоблаб чиқиш натижасида маълум қилди.
Маълумотларга кўра, Дуданинг рақиби — Варшава мэри Рафал Тшасковский эса 48,79 фоиз овоз тўплаган.
Мамлакат Сайлов комиссиясининг маълум қилишича, ҳали саналмаган овозлар сайлов натижаларига сезиларли таъсир кўрсатмайди. Комиссия овоз бериш жараёнларининг якуний натижалари қачон тақдим этилишига ойдинлик киритмаган.
Президентлик сайловларининг иккинчи турида овоз берувчиларнинг 68,12 фоизи иштирок этган. Бу 1989 йилдан буён кузатилган энг юқори кўрсаткич ҳисобланади.
Рафал Тшасковский тарафдорларининг Reuters’га маълум қилишича, улар овоз бериш жараёнидаги қонунбузарликлар тўғрисида маълумотларни йиғмоқда.
Польшада президентлик сайловларининг биринчи тури 28 июнь куни бўлиб ўтган эди. Унда Дудани сайловчиларнинг 43,5 фоизи қўллаб-қувватлаган бўлса, Тшасковскийда ушбу кўрсаткич 30 фоиздан бироз ошган.
Эслатиб ўтамиз, Польшада президентлик сайловлари 10 май куни ўтказилиши керак эди, бироқ сайловлар «мухолифот томонидан бу йилги президентлик сайловларини конституцияда белгиланган муддатда ўтказиш имконини берувчи барча конструктив таклифларни қабул қилишдан бош тортгани муносабати билан қолдирилган эди. Амалдаги президент Анжей Дуда 2015 йилги сайловларда 51,55 фоиз овоз тўплаб ғолиб чиққан эди.
Изоҳ (0)