Хитойда COVID-19’га чалинганлар 83 602 кишига етди. Жанубий Кореяда касалланган сони бир суткада 62 нафарга ошди

Хитойда сўнгги суткада коронавирус билан касалланиш бўйича 9 та ва касаллик белгисиз ўтаётган 6 та ҳолат аниқланди, беморларнинг 14 нафари соғайди, деб хабар бермоқда «РИА Новости» Хитой Соғлиқни сақлаш миллий комиссиясига таяниб.

Қайд этилишича, аниқланган янги касалланиш ҳолатлари, шу жумладан, белгисиз ҳолатларнинг барчаси четдан юқтирилган.

Мамлакатда умумий ҳисобда 83 602 киши коронавирусга чалинган, уларнинг 78 648 нафари соғайган, 4634 нафар бемор COVID-19 қурбонига айланган. Касалхонада 320 киши даволанишда қолмоқда.

Шунингдек, Хитойда касаллик белгисиз ўтаётган 6 та ҳолат аниқланган. Шундай кишиларнинг яна 110 нафари кузатувда бўлиб турибди.

Жанубий Кореяда эса сутка давомида 62 киши коронавирусга чалингани қайд этилиб, касалланганларнинг умумий сони 13 479 нафарга етди.

Сутка давомида 23 киши соғайиб, тузалганларнинг умумий сони 12 201 нафарга етди. Касаллик қурбонлари сони 289 нафарни ташкил қилмоқда.

Бир кун аввал касалланганлар сони 44 кишига ошган, 34 киши соғайганди.