Озарбайжон—Арманистон чегарасида қуролли тўқнашув юз берди, озарбайжонлик уч ҳарбий ҳалок бўлди

12 июль куни Озарбайжон ва Арманистон чегарасида икки томон аскарлари ўртасида қуролли тўқнашув юз берди, деб хабар қилади «РБК».

Бокунинг маълум қилишича, Ереван ўт очиш режимини бузган озарбайжонлик ҳарбийларнинг позицияларини артиллериядан ўққа тутган.

Озарбайжон Мудофаа вазирлиги матбуот хизмати қуролли тўқнашув оқибатида 3 нафар ҳарбий хизматчи ҳалок бўлганини эълон қилди. Дастлаб ҳужумни қайтарган чавуш (сержант) ва аскар ҳалок бўлгани маълум қилинган. Кейинроқ эса яна бир аскар олган жароҳатлари оқибатида шифохонада вафот этган.

Арманистон Мудофаа вазирлигининг маълумотларига кўра, бир гуруҳ озарбайжонлик аскарлар юк машинасида давлат чегарасини бузиб ўтишга уринган. Огоҳлантиришдан кейин Озарбайжон аскарлари автомобилни ташлаб қочган ва беркинган, бироқ бир соатдан сўнг, артиллериядан ўт оча бошлашган. Арманистон қуролли кучлари бунга жавобан ўт очган ва ҳужумни қайтарган. Ереваннинг таъкидлашича, улар томондан ҳеч кимга жароҳат етмаган.

Арманистон Мудофаа вазирлиги матбуот котиби Шушан Степанян ўзининг Facebook’даги саҳифасига Озарбайжон қуролли кучлари арман ҳарбийларининг позициясини яна ўққа тутишни бошлагани ҳақида изоҳ ёзиб қолдирди.

«Икки-уч соатлик узилишлардан сўнг, душман тараф провакацион ҳаракатларни қайта бошлаб, арман позициясига қарата ўт очди», — деб ёзади Степанян.

Сўнгги 30 йилдан буён Арманистон ва Озарбайжон ўртасидаги муносабатлар Тоғли Қорабоғ ҳудуди сабаб ёмонлашган. Минтақа Озарбайжон ҳудудида жойлашган бўлса-да, 1991 йилда унинг таркибидан чиққан. Тан олинмаган ушбу республика ҳудудида асосан арманлар истиқомат қилиб келади. Икки мамлакат ўртасидаги чегарада мунтазан қуролли тўқнашувлар содир бўлиб туради.