Бишкекдаги шошилинч тиббиёт маркази ходимларининг тўртдан бир қисми касаллик варақаси очтирган ва даволанмоқда. Бу ҳақда Kloop нашри марказ жонлантириш бўлими мудири Егор Борисовга таяниб хабар берган.
Унинг маълумотига кўра, жами 101 нафар ходим касаллик варақаси очтириб, даволанмоқда, марказ штатидаги ходимлар сони эса 447 нафарни ташкил қилади. Шундан 42 нафари меҳнат таътилида — улар ёши ёки сурункали касалликларга чалингани туфайли касаллик юқтириб олиш хавфи юқори бўлган рўйхатга киритилган.
Борисовга кўра, касаллик варақаси очтирганлар орасида 10 га яқин кишида коронавирус аниқланган, қолганлар эса пневмония ва ЎРВИ симптомларига эга касаллик билан курашмоқда.
«Ҳаммаси ҳар хил аҳволда даволаняпти. Деярли ҳамма ходим ўз уйида амбулатор шароитда даволанмоқда, бир неча киши шифохоналарга ётқизилган», — дея қўшимча қилган шифокор.
Мудирнинг сўзларига кўра, гуруҳлардаги юклама ҳали ҳам юқори ва тез ёрдам чақирувларга вақтида етиб боришга улгурмаяпти.
«Агар 118-линия ва кунлик стационарлар бўлмаганида ҳолимиз не кечишини тасаввур қилишнинг ўзи қўрқинчли. Албатта, улар ҳам кучли юклама остида, фаол равишда одамларга маслаҳат ҳамда тавсиялар бермоқда. Лекин барибир мурожаатлар кўпайиб кетган», – дейди Егор Борисов.
Шунингдек, Борисов тез ёрдамдаги ходим етишмовчилиги нафақат касалликлар, балки бошқа сабаблар туфайли ҳам кузатилаётганини қайд этди. 210 нафар шифокор иш ўрнидан 85 таси вакант, 342 та ўрта маълумотга эга тиббиёт персоналининг 45 таси бўш иш ўрни ҳисобланади. Ушбу маълумотлар бўйича тез ёрдам врачлари ўртача 9-10 минг қирғиз сўми (115-128 АҚШ доллари атрофида) миқдорида ойлик иш ҳақи олади.
Мавзуга доир: YouTube’да 4 мингдан зиёд дизлайклар қўйилган Жээнбековнинг мурожаати ўчириб ташланди ва қайта юклаб қўйилди
Аввалроқ 9 июлда Қирғизистон бош вазири барча тиббиёт ходимларини таътилдан чақириб олишни буюргани, 10 июлда Қирғизистон соғлиқни сақлаш вазирида пневмония, унинг ўринбосарида коронавирус аниқлангани ҳақида хабарлар берилган.
Қирғизистонда 13 июль ҳолатига кўра, 11 117 нафар кишида коронавирус инфекцияси қайд этилган, 3 460 нафар бемор касалликдан тузалган, 147 киши COVID-19 асоратлари оқибатида вафот этган. Мамлакатда COVID-19 тестлари салбий чиққан, бироқ пневмониядан вафот этган беморлар сони 452 нафарга етган.
Изоҳ (0)