Жаҳон соғлиқни сақлаш ташкилоти сўнгги суткада коронавирусга чалиниш бўйича 230,3 мингта ҳолатни қайд этди, деб хабар бермоқда «РБК» ташкилотнинг 13 июль куни эълон қилган маълумотларига таяниб.
Аввалги антирекорд 10 июль куни қайд этилган бўлиб, унда сутка давомида касалланганлар сони 228 минг кишини ташкил этганди.
ЖССТ маълумотига кўра, дунёда умумий ҳисобда 12,5 миллион киши коронавирусга чалингани тасдиқланган. Шундан 561 мингдан ортиғи вафот этган. Жонс Ҳопкинс маълумотларида эса дунё бўйича 12,7 миллион киши COVID-19 билан касаллангани, беморларнинг 566 мингдан ортиғи вафот этгани қайд этилган.
The New York Times’нинг ёзишича, биргина АҚШнинг ўзида сўнгги икки кун давомида коронавирус аниқланганлар сони 60 минг кишидан ошиб кетган. Мамлакат касалланганлар сони бўйича дунёда биринчи ўринда бўлиб турибди. У ерда COVID-19 3,2 миллиондан ортиқ кишида аниқланган. Ундан кейинги ўринларни Бразилия (1,8 миллиондан ортиқ) ва Ҳиндистон (қарийб 850 минг киши) эгаллаган. Бундан аввал учинчи ўринни Россия эгаллаб келаётганди.
Аввалроқ ЖССТ раҳбари Тедрос Гебрейесус коронавирус пандемияси тугамаётгани, аксинча тезлашаётганини маълум қилганди. Ташкилотнинг Россиядаги вакили Мелита Вуйнович ҳам коронавирус ўзгармагани, касалликнинг жиддийлиги аввалгидек қолганини айтганди.
Изоҳ (0)