Ўқитувчиларни мажбурий меҳнатга жалб қилгани учун жаримага тортилган Зангиота ҳокими ўринбосари мазкур масала бўйича судда ютиб чиқди

Халқ таълими вазирлиги 2020 йилнинг 5 июнь куни Тошкент вилояти Зангиота тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Бахтиёр Мамадалиев ўқитувчиларни мажбурий обуна ва меҳнатга жалб қилгани учун 15 миллион 610 минг сўм жаримага тортилгани ҳақида хабар берганди. Бахтиёр Мамадалиев эса мазкур масала бўйича судга мурожаат қилган. Бу ҳақда ЎзА хабар берди.

Вазирлик ахборотида бу иш халқ таълими вазири Назорат-ҳуқуқий хизмати ҳамда Тошкент вилояти Бандлик бош бошқармаси Давлат меҳнат инспекцияси ҳамкорлигида амалга оширилгани қайд этилган.

Унга кўра, ҳоким ўринбосари мактаб директорларига январь ойида газета ва журналларга обуна бўлиш ҳақида топшириқ берган, мактаб микроҳудудидаги маҳалла фуқаролар йиғинида яшовчи кам таъминланган аҳолини хатловдан ўтказишда ўқитувчилардан ёрдам сўраган. Бундан ташқари, 28 май куни ёшлар етакчиси ва яна бир нафар ходим билан бирга тумандаги барча мактаб директорлари ва 80 нафардан ортиқ ўқитувчини ўт юлиш ва ерни чопиқ қилиш, юмшатиш кўринишидаги мажбурий меҳнатга жалб қилган.

ЎзАнинг хабар беришича, мазкур хабарлар тарқалгач, ҳоким ўринбосари ўзига нисбатан чиқарилган қарордан норози бўлиб, судга мурожаат қилган. ЎзА бўлиб ўтган воқеани атрофлича ўрганиб чиқиш мақсадида ҳодиса иштирокчилари билан боғланган.

«Мени кўпроқ интернет тармоқларида тарқалган хабарлар ташвишга солди. Чунки менга тааллуқли хабар чиқиши билан бундан яқинларим хавотирга тушиб, бу ҳақда суриштира бошлашди. Мен эса ўша дақиқаларда шунчаки айбсиз айбдор эдим. Жарима тўлашдан кўра, айнан мана шу нарса мени судга мурожаат қилишга мажбур қилди», — дея таъкидлаган Бахтиёр Мамадалиев.

Агентликнинг қайд этишича, Зангиота тумани маъмурий судида бўлиб ўтган суд мажлисида Бахтиёр Мамадалиев ҳуқуқбузарлик фактларини инкор қилиб, ўзига қарши қарор далилларсиз, шошма-шошарлик билан, бир томонлама қабул қилинганини, ҳеч кимни обуна бўлишга ва кам таъминланган аҳолини хатловдан ўтказишга мажбурламаганини ҳамда мажбурий меҳнатга жалб қилмаганини маълум қилган.

Бахтиёр Мамадалиев ЎзАга Тошкент вилояти ҳокими ва Зангиота тумани ҳокимининг тегишли фармойишлари асосида 2020 йил учун газета ва журналларга обуна ташкил этиш бўйича тарғибот ишлари билан шуғулланганини таъкидлаган.

ЎзАнинг ёзишича, ҳоким ўринбосари кам таъминланган аҳолини хатловдан ўтказиш бўйича туман халқ таълими мудиридан амалий ёрдам кўрсатишни сўраган. Бахтиёр Мамадалиевнинг таъкидлашича, бундан мақсад шу йўналишда ижтимоий адолат таъминланишига эришиш бўлган. «Чунки ўқитувчилар жамиятнинг зиёли қатлами бўлиши билан бирга, вазиятни аниқлаш, ҳақиқий муҳтож одамларнинг рўйхатга киришида жамоат назорати ўрната олади. Шундай ишонч билан ўқитувчилардан ёрдам сўралгани учун ҳам улар бу ишни беминнат амалга оширган. Қолаверса, карантин пайтида ҳақиқатан кам таъминланган ёки муҳтож шахсларнинг эътибордан четда қолмаслиги давлат сиёсати даражасидаги иш бўлган», — дейилади хабарда.

Судда гувоҳ тариқасида сўроқ қилинган Зангиота тумани Халқ таълими бўлими мудири вазифасини бажарувчи А.Раҳматуллаев Зангиота тумани ҳокими ўринбосари қўнғироқ қилиб, 2020 йил 28 май куни ходимларни йиғиш кераклигини, мактабларни таъмирлаш ва ободонлаштириш ишлари ҳақида гаплашиб олиш кераклигини айтганини, лекин йиғилиш бўлмаганини маълум қилган.

Халқ таълими бўлими раҳбари обуна ишлари эса ихтиёрий равишда амалга оширилгани, мактаб микроҳудудида яшовчи кам таъминланган аҳолини хатловдан ўтказиш ва ҳисоботларни ҳокимиятга топшириш тўғрисида ёрдам сўралгани, буни тўғри тушунган ҳолда бу масалада ёрдам берилгани, ҳеч кимни мажбурий меҳнатга жалб этмаганини баён қилган.

Судда гувоҳ тариқасида сўроқ қилинган 19-мактаб директори М.Телефова мактаб ҳудудини ободонлаштириш ишларига эътибор қаратиш лозимлиги ҳақида кўрсатма бўлгани, 28 май куни шу мақсадда ишга боргани, лекин ишламасдан қайтиб келгани, уларни ҳеч ким ишлашга мажбурламаганини баён этган.

Судда гувоҳ сифатида қатнашган 1-мактаб директори Б.Аҳмедов, 2-мактаб директори Х.Жалолова, 3-мактаб директори Ш.Худоёров ва бошқалар М.Телефованинг кўрсатмаларини тасдиқлаб, шунга ўхшаш кўрсатма бериб, мажбурий меҳнатга жалб қилинмаганликларини айтган.

Суд ўз қарорида Маъмурий жавобгарлик тўғрисидаги кодекснинг 271-моддаси 1-бандида маъмурий ҳуқуқбузарлик ҳодисаси ёки аломати йўқ бўлса, маъмурий ҳуқуқбузарлик тўғрисидаги ишларни юритишни бошлаш мумкин эмаслиги, бошланган иш эса тугатилиши лозимлиги кўрсатилганини қайд этган.

Зангиота тумани маъмурий суди судьяси А.Абдураззоқов туман ҳокими ўринбосари Б.Мамадалиевнинг ҳаракатларида Маъмурий жавобгарлик тўғрисидаги кодекснинг 51-моддаси 1-қисмида назарда тутилган ҳуқуқбузарлик аломатлари ўз тасдиғини топмаганлигини эътиборга олиб, Тошкент вилояти Меҳнат инспекцияси бошлиғининг ўринбосари вазифасини бажарувчи Ўткир Турсунбоевнинг 2020 йил 3 июндаги Бахтиёр Мамадалиевга Маъмурий жавобгарлик тўғрисидаги кодекснинг 51-моддаси 1-қисми билан базавий ҳисоблаш миқдорининг 70 баравари, 15 миллион 610 минг сўм жарима солиш тўғрисидаги қарорини бекор қилиш ва унга нисбатан юритилган маъмурий ҳуқуқбузарлик тўғрисидаги ишни мазкур кодекснинг 271-моддаси 1-бандига асосан тугатишни лозим деб топган.

Судда даъвогар сифатида иштирок этган иккинчи тараф вакили — Тошкент вилояти Меҳнат инспекцияси бошлиғининг ўринбосари вазифасини бажарувчи Ўткир Турсунбоевнинг маълум қилишича, мажбурий меҳнат билан боғлиқ бу иш инспекцияга халқ таълими вазири Назорат-ҳуқуқий хизмати томонидан барча ҳужжатлар жамланган ҳолда тақдим этилган.

«Вазирликнинг амалий чора кўриш бўйича ваколати бўлмагани учун ҳам улар шундай йўл тутган. Мазкур хизмат томонидан тўпланган барча далилларни биз мустақил равишда текшириб, гувоҳларнинг фикрларини олиб, ҳақиқатан мажбурий меҳнат ҳолатига йўл қўйилганига ишонч ҳосил қилганимиздан сўнг Зангиота тумани ҳокими ўринбосарига жарима жазоси қўллаганмиз», — дея маълум қилган Ўткир Турсунбоев.

Унинг қайд этишича, суд мажлисида мансабдор шахснинг ўзи ҳам бевосита иштирок этгани учун ҳам айрим гувоҳлар аввалги кўрсатмаларини ўзгартирган. «Инобатга олиниши керак бўлган, рад қилиб бўлмайдиган фактларимиз бор. Шунинг учун ҳам биз бу иш бўйича протест келтирилиши учун прокуратурага мурожаат қилдик. Иш кассация инстанциясида кўриб чиқилиши учун ҳам ариза топширилди», — деди инспекция раҳбари.