Шайхонтоҳур тумани бўйича ИИО ФМБ ҳузуридаги Тергов бўлими томонидан фирибгарлик ҳолати юзасидан 33 ёшли З.А.га нисбатан бўлган жиноят иши бўйича дастлабки тергов ҳаракатлари якунга етди, деб хабар бермоқда ИИВ ҳузуридаги Тергов департаменти.
Хабарга кўра, З.А. муқаддам судланган бўлиб, унга нисбатан фирибгарлик ҳолати юзасидан бошқа жиноят иши мавжуд бўлган. У 2020 йил 10 февралидан 17 февралигача Шайхонтоҳур тумани Тинчлик кўчасида яшовчи М.Х. исмли аёлнинг яшаш уйига 3 марта бориб, унга тегишли жами 37 миллион 968 минг 304 сўмлик Туркиядан келтирилган кийим-кечаклар пулини 2020 йилнинг май ойига қадар бериш шарти билан олиб кетиб, шу кунгача олинган кийим-кечакларни сотиб, пулларини ўз эҳтиёжларига ишлатиб юборган.
Мазкур ҳолат юзасидан Шайхонтоҳур тумани бўйича ИИО ФМБ ҳузуридаги Тергов бўлими томонидан З.А.га нисбатан Жиноят кодексининг 168-моддаси 3-қисми «б» банди (Фирибгарлик) билан жиноят иши қўзғатилган.
Дастлабки тергов жараёнида З.А.га тегишли моддалар билан айб эълон қилиниб, унга нисбатан қамоққа олиш тарзидаги эҳтиёт чораси қўлланилиб, етказилган моддий зарарнинг муайян қисми, яъни 2 миллион 320 минг сўм қопланган.
Жиноят иши айблов хулосаси билан тегишли судловга ошириш масаласини кўриб чиқиш учун туман прокуратурасига юборилган.
Департаментдан маълум қилинишича, мазкур жиноятни содир этган шахс базавий ҳисоблаш миқдорининг уч юз бараваридан тўрт юз бараваригача миқдорда жарима ёки икки йилдан уч йилгача ахлоқ тузатиш ишлари ёхуд муайян ҳуқуқдан маҳрум этилган ҳолда 5-8 йилгача озодликдан маҳрум қилиш билан жазоланиши мумкин.
Аввал Тошкентда масжид қурилишига эҳсон қилиш баҳонасида қарийб 34 миллион сўмни АҚШга тегишли SIP виртуал рақами воситасида ўзлаштирган фирибгар қўлга олингани, Тошкент вилоятида 45 нафар фуқаронинг 150 миллион сўм пулини талон-торож қилган шахс 5 йилга озодликдан маҳрум қилингани, Бухорода фирибгарлик йўли билан бир қанча жиноятлар, ўғирлик ва товламачилик қилган жиноий гуруҳ фаолияти фош қилингани ҳақида хабарлар берилганди.
Изоҳ (0)