Ўғрилик содир этгани учун қидирувда бўлган икки киши Тошкентда қўлга олинди, деб хабар бермоқда ИИВ матбуот хизмати.
Улардан бири 6 июль куни соат 18:30 да Миробод туманида қўлга олинган. Ички ишлар органлари ходимлари Қўйлиқ ота кўчаси «Дилзор» кафеси олдида бир номаълум шахсни бемақсад турганини кўриб олдига бориб, шахсини тасдиқловчи ҳужжатини сўраганда фуқаро қочишга уринган. Лекин ходимларнинг тезкорлиги натижасида ушбу шахс ушланиб, Миробод тумани 4-сонли ИИБга олиб борилиб, шахси текширилган.
Текширив натижаларига кўра, унинг Қорақалпоғистон Республикаси, Тўрткўл туманида яшовчи 1989 йилда туғилган И.И. эканлиги, 2020 йилнинг июнь ойидан буён Қорақалпоғистоннинг Тўрткўл тумани ИИБ томонидан Жиноят кодексининг 169-моддаси (Ўғрилик) билан қидирув эълон қилинганлиги аниқланган.
Бундан ташқари, 8 июль куни соат 14:50 да Яшнобод тумани «Бир марталик иш билан таъминлаш биржаси» олдида бемақсад юрган бир номаълум шахс ички ишлар органлари ходимларини кўриб яширинишга ҳаракат қилган вақтда ушланган.
Яшнобод тумани 6-сонли ИИБга олиб бориб шахси текширилганда, ушбу шахс Самарқанд вилояти, Иштихон тумани, 129-уйда рўйхатда турувчи 1983 йилда туғилган Ю.Г. эканлиги аниқланиб, у 2020 йил июнь ойидан буён Бектемир тумани ИИО ФМБ томонидан Жиноят кодексининг 169-моддаси (Ўғрилик) билан жиноят иши қўзғатилиб, ҳозирда унга нисбатан қидирув эълон қилинганлиги аниқланди.
Ҳозирда ҳар икки ҳолат юзасидан суриштирув ишлари олиб борилмоқда.
Изоҳ (0)