Сурхондарё вилояти ИИБ ахборот хизмати Жарқўрғонда суд ходими ва унинг ҳайдовчисига милиция ходимлари томонидан жароҳат етказилгани борасидаги ҳолатга ўз муносабатини билдирди.
Маълумотларга кўра, Жиноят ишлари бўйича Жарқўрғон туман судининг раиси Я.Б. ҳамда ҳайдовчи Р.Р. 10 июль куни хизмат машинасида туман суд биноси томон ҳаракатланиб кетаётганида туман марказига кираверишда блокпостда улар тўхтатилган ва постдан ўтказилмаган. Шу вақтда постда бўлган туман ҳокими З.Давлатов бошчилигидаги ишчи гуруҳ Вазирлар Маҳкамасининг махсус комиссияси қарорига зид равишда, туман суди хизмат машиналарини постдан ўтказмаган. Шунингдек, ишчи гуруҳ ходимлари юзага келган тирбандликда навбат кутиб турган фуқаролар олдида судья ва суд ходимларини обрўсизлантиришга уринган.
Йўл-патруль хизмати ходими туман суди ҳайдовчисининг билагидан тортган, ИИБ бошлиғи ва ўринбосари автомашина калитини олиб қўйган. Уни ўтирган жойидан куч ишлатиб тортиб, кўйлагини йиртиб юборган. Суд ходими ИИБ биносига олиб келиб, ИИБ бошлиғи ўринбосари уни ҳақоратлаган, бўйнидан бўғган, сўнгра вақтинча ушлаб туриш ҳибсхонасига қамаб қўйган.
Вилоят ИИБ версиясига кўра, Жарқўрғон тумани «Янгиобод» маҳалласи ҳудудида ташкил этилган блокпостда 10 июль куни соат 09:50 ларда туман ҳокими З.Давлатов, туман прокурори Б.Ҳайдаров ва туман ИИБ бошлиғи подполковник Б.Хидиров томонидан ички ишлар органлари ва хизматга жалб этилган бошқа ходимларнинг фаолиятини мувофиқлаштириш бўйича ишлар олиб борилган.
Шу вақт ушбу блокпостга Жиноят ишлари бўйича туман судига қарашли Nexia 3 русумли хизмат автомашинаси қарама-қарши йўналиш бўйлаб ҳайдаб келинган. Туман ҳокими ва постда хизмат олиб бораётган ички ишлар ходимлари мазкур автотранспортни йўлнинг қатнов қисмидан четга олишни талаб қилганларида, ҳайдовчи ходимларнинг қонуний талабига бўйсунмай автомашинани йўлдан олмаган. 20-25 дақиқа давомида автомашина тўхтатиб қўйилиши оқибатида постда сунъий тирбандлик юзага келган.
Шундан сўнг, ҳолатга ойдинлик киритиш мақсадида ҳайдовчи Р.Р. соат 10:30 ларда туман ИИБга олиб борилиб, соат 11:00 ларда туман ИИБдан чиқариб юборилган.
Шу куни ҳайдовчи Р.Р. ўзига тан жароҳати етказилганлиги важи билан туман шифохонасига мурожаат қилган. Шифохонанинг бу ҳақдаги хабарномаси туман ИИБга юборилиб, ўрнатилган тартибда рўйхатдан ўтказилиб, хабарнома тегишлилиги бўйича туман прокуратурасига юборилган.
Ҳозирги вақтда юзага келган ҳолат прокуратура органлари томонидан ўрганилмоқда, иштирокчиларнинг ҳаракатларига ҳуқуқий баҳо берилади.
Эслатиб ўтамиз, Республика махсус комиссиясининг 8 июлдаги қарори билан Ўзбекистонда 10 июлдан 1 августга қадар карантин чекловлари қайтадан кучайтирилган. Шунингдек, автотранспорт ҳаракати ҳам чекланган. Республика махсус комиссияси қарори билан Автотранспорт воситалари ҳаракатланишига махсус рухсатномалар талаб этилмайдиган ҳолатлар рўйхати тасдиқланган.
Изоҳ (0)