O‘g‘rilik sodir etgani uchun qidiruvda bo‘lgan ikki kishi Toshkentda qo‘lga olindi

O‘g‘rilik sodir etgani uchun qidiruvda bo‘lgan ikki kishi Toshkentda qo‘lga olindi, deb xabar bermoqda IIV matbuot xizmati.

Ulardan biri 6-iyul kuni soat 18:30 da Mirobod tumanida qo‘lga olingan. Ichki ishlar organlari xodimlari Qo‘yliq ota ko‘chasi “Dilzor” kafesi oldida bir noma’lum shaxsni bemaqsad turganini ko‘rib oldiga borib, shaxsini tasdiqlovchi hujjatini so‘raganda fuqaro qochishga uringan. Lekin xodimlarning tezkorligi natijasida ushbu shaxs ushlanib, Mirobod tumani 4-sonli IIBga olib borilib, shaxsi tekshirilgan.

Tekshiriv natijalariga ko‘ra, uning Qoraqalpog‘iston Respublikasi, To‘rtko‘l tumanida yashovchi 1989-yilda tug’ilgan I.I. ekanligi, 2020-yilning iyun oyidan buyon Qoraqalpog‘istonning To‘rtko‘l tumani IIB tomonidan Jinoyat kodeksining 169-moddasi (O‘g‘rilik) bilan qidiruv e’lon qilinganligi aniqlangan.

Bundan tashqari, 8-iyul kuni soat 14:50 da Yashnobod tumani “Bir martalik ish bilan ta’minlash birjasi” oldida bemaqsad yurgan bir noma’lum shaxs ichki ishlar organlari xodimlarini ko‘rib yashirinishga harakat qilgan vaqtda ushlangan.

Yashnobod tumani 6-sonli IIBga olib borib shaxsi tekshirilganda, ushbu shaxs Samarqand viloyati, Ishtixon tumani, 129-uyda ro‘yxatda turuvchi 1983-yilda tug‘ilgan Yu.G. ekanligi aniqlanib, u 2020-yil iyun oyidan buyon Bektemir tumani IIO FMB tomonidan Jinoyat kodeksining 169-moddasi (O‘g‘rilik) bilan jinoyat ishi qo‘zg‘atilib, hozirda unga nisbatan qidiruv e’lon qilinganligi aniqlandi.

Hozirda har ikki holat yuzasidan surishtiruv ishlari olib borilmoqda.