Ўзбекистонда кунига 20-22 мингта тест олиняпти, бу мингта аҳолига нисбатан 42 тани ташкил этади. Бу ҳақда Соғлиқни сақлаш вазирининг биринчи ўринбосари, Республика санитария-эпидемиологик осойишталик агентлиги директори Баҳодир Юсуфалиев 12 июль куни «Ўзбекистон 24» телеканалига берган интервьюсида айтиб ўтди.
Баҳодир Юсуфалиевнинг маълум қилишича, коронавирусга ўз-ўзидан бориб тест топшириш керак эмас.
«Тест, аввало, беморлар, яъни карантинда жойлашган шахслардан ва клиник-эпидемиологик белгилари бўлган шахслардан олинади. Ундан кейин бошқа аҳоли қатламларидан тест олинади», – деди Республика бош санитар-эпидемиологи.
Унинг алоҳида таъкидлашича, ҳеч битта давлат аҳолини 100 фоиз тест билан қамраб олмаган ва қамраб ҳам ололмайди.
«Мисол учун, Жанубий Кореяда кунига Ўзбекистонга ўхшаб 20 мингта тест амалга оширилади. Ундан ташқари, тест олиш нормал ҳолатда ҳар минг аҳолига нисбатан 26 тани ташкил қилади. Энди Ўзбекистонни олсак, кунига 20-22 мингта тест оламиз ва бу мингта аҳолига нисбатан 42 тани ташкил этади. Деярли икки баробар кўп», – деди Юсуфалиев.
Унинг қўшимча қилишича, соғлиқни сақлаш тизими ўзининг вазифасини бажаради, лекин аҳоли, биринчи навбатда, тартиб-интизомга – санитария- эпидемилогия талабларга, албатта, риоя қилиши керак.
Эслатиб ўтамиз, Баҳодир Юсуфалиев февраль ойи ўрталарида «Дарё»га берган интервьюсида «Мабодо ушбу касаллик республикамизга кириб келса, бу бўйича ҳам тайёргарлигимиз бор. Тегишли шифохоналаримизда ўринлар, дори воситалари ва тиббий буюмлар захираси ажратилган. Керакли миқдорда тиббий ёрдам ташкил этилади», деган эди.
Маълумот учун, АҚШ давлат котиби Майкл Помпео коронавирусдан ҳимояланиш учун керакли инфратузилмага эга бўлмаган ҳудудлардан бири сифатида Ўзбекистонни ҳам қайд этиб, Ўзбекистон коронавирус каби кенг кўламли хавфга қарши тура олиш имкониятига эга эмас, деган фикрни билдирган эди.
Изоҳ (0)