Хитойда бир суткада 2 кишида коронавирус аниқланди, Жанубий Кореяда касалланганлар сони 35 нафарга ошди

Хитойда сўнгги суткада коронавирус билан касалланиш бўйича 2 та ва касаллик белгисиз ўтаётган 4 та ҳолат аниқланди, беморларнинг 14 нафари соғайди, деб хабар бермоқда «РИА Новости» Хитой Соғлиқни сақлаш миллий комиссиясига таяниб.

Қайд этилишича, аниқланган янги касалланиш ҳолатларининг барчаси четдан юқтирилган.

Мамлакатда умумий ҳисобда 83 587 киши коронавирусга чалинган, уларнинг 78 623 нафари соғайган, 4634 нафар бемор COVID-19 қурбонига айланган. Касалхонада 330 киши даволанишда қолмоқда.

Шунингдек, Хитойда касаллик белгисиз ўтаётган 4 та ҳолат аниқланган. Шундай кишиларнинг яна 111 нафари кузатувда бўлиб турибди.

Жанубий Кореяда эса сутка давомида 45 киши коронавирусга чалингани қайд этилиб, касалланганларнинг умумий сони 13 373 нафарга етди. Мамлакатда 4 кундан буён кунлик касалланишлар сони камайиб бормоқда.

Касалликлар профилактикаси ва назорати маркази (KCDC) маълумотларига кўра, янги касалланиш ҳолатларининг 22 тасида вирус мамлакатнинг ўзида, қолган 23 тасида четдан юқтирилган.

Сутка давомида 79 киши соғайиб, тузалганларнинг умумий сони 12 144 нафарни ташкил қилмоқда. Касаллик қурбонлари сони 288 нафарга етди.