Болгария пойтахти София шаҳрида ҳукуматга қарши президентни қўллаб-қувватлашга қаратилган норозилик намойиши ўтказилди. Бу ҳақда Facebook’даги Balkan Observerfor Ukraine саҳифасида хабар қилинган.
Юзлаб одамлар президент Румен Радевни қўллаб-қувватлаб, ҳукуматга қарши норозилик намойишида иштирок этди.
Аввал Болгарияда прокуратура, Ички ишлар вазирлиги, Гувоҳлар ҳимояси бюроси ва бошқа органлар томонидан София ҳарбий суди ҳамда Махсус жиноий ишлар бўйича суди қарорига кўра президент администрациясида тинтув ўтказилганди.
Хусусан, президентнинг хавфсизлик ва мудофаа масалалари бўйича маслаҳатчиси Илья Милушев ва коррупцияга қарши кураш ва ҳуқуқий масалалар бўйича котиб Пламен Узуновнинг кабинетларида тинтув ўтказилган. Кейинчалик иккала амалдор ҳам савдога таъсир қилганликда гумонланиб ҳибсга олинган. Шунингдек, таниқли бизнесмен Пламен Бобоков ҳам қамоққа тушган.
Мамлакат президенти ушбу чораларнинг кўрилишига унинг ҳукуматни ва прокуратурани танқид қилгани сабаб бўлган деб ҳисобламоқда. У намойишда тўпланган одамлар олдида нутқ сўзлаб, ижро ҳокимияти ҳамда прокуратура таркибидаги «мафия»ни бошқарувдан четлатиш лозимлигини таъкидлаган.
Эслатиб ўтамиз, аввалроқ Болгария бош вазири президентни яширин равишда бошқаларнинг фаолиятини кузатганликда айблаганди. Президент ҳамда мамлакат ҳукумати ўртасидаги низо янги даражага кўтарилган. Бош вазир давлат раҳбари томонидан уйини дрон воситасида яширин равишда кузатиш ҳақида буйруқ берилганидан хабар топганини айтган.
Изоҳ (0)