Наманган вилояти ҳокими Хайрулло Бозоров Янгиқўрғон туманида туризм ва экотуризмни янада ривожлантириш чора-тадбирлари тўғрисидаги қарорни қабул қилди. Бу ҳақда «Дарё» мухбири Азизбек Абдувалиев хабар бермоқда.

Фото: Раҳмонжон Мамадалиев

Янгиқўрғон туманидаги Нанай қишлоғининг туризм салоҳиятини оширишга қаратилган ушбу қарор билан ҳудуддаги қаровсиз турган кўплаб дам олиш масканлари негизида замонавий туризм объектлари ташкил этилади ҳамда қишлоқ экотуризм марказига айлантирилади.

Ҳудуддаги фойдаланилмаётган активлар туман ҳокимлиги балансига қайтарилади ва улар ўрнида замонавий дам олиш жойлари — кемпинг, оромгоҳлар, меҳмон уйлари ташкил этиш мақсадида маҳаллий ва хорижий инвесторлар жалб этилади.

Ушбу қарорга мувофиқ вилоят ҳокимлиги ҳузурида алоҳида юридик шахс мақомига эга бўлган Нанай қишлоғини экотуризм марказига айлантириш, дам олиш масканлари бино-иншоотларидан фойдаланиш ва улар фаолиятини мувофиқлаштириш дирекцияси ташкил этилмоқда.

Маълумот учун,  қўшни Қирғизистон билан чегарадош тоғли ҳудудда жойлашган Нанай қишлоғида 15 мингдан ортиқ аҳоли истиқомат қилади. Нанайда бугунги кунгача 100 га яқин меҳмон уйи рўйхатга олинган.