Соғлиқни сақлаш вазирлиги, АОКА, Ёшлар ишлари бўйича агентлик ҳамда Миллий масс-медиани қўллаб-қувватлаш ва ривожлантириш фонди таъсислигида ташкил қилинган Telegram’даги «Коронавирус Инфо» каналида Ўзбекистон шароитида COVID-19 юқтириб олиш хавфи юқори бўлган ёки фуқаролар ҳаётига инфекциянинг киришига унчалик катта хавф туғдирмайдиган масканлар ҳамда машғулотлар ҳақида тўққизлик рейтинг тузиб чиқилди.
Унга кўра, энг хавфли жой, яъни 9-ўринни тунги клубларга бориш эгаллаб турибди. Ўзбекистонда Республика махсус комиссиясининг қарорларига кўра, 15 мартдан буён ҳали ҳеч бир ҳудудда тунги клублар, дискотекалар, караоке, бильярд заллари, спа ва массаж салонлари фаолиятига рухсат берилмаган.
8-ўринда театр, концерт, масжид, черков, ибодатхона, стадион, спиртли ичимликлар ичиладиган жойлар (паб, бар) ва зиёфатларга бориш коронавирус инфекциясини юқтириб олиш хавфини ошириши қайд этилган.
7-ўринда тўйларга бориш, қўл бериб ёки қучоқлашиб кўришиш, тиббий ниқоб тақмаслик, умумий ошхоналарда овқатланиш ва болаларнинг майдончаларда ўйнаши COVID-19 юқтириб олиш хавфини ошириши баён қилинган.
6-поғонада парвозларни амалга ошириш, ресторанга бориш, автобус ёки поездда саёҳат қилиш, спорт залидаги машғулотлар, боулинг, кекса ёшдаги кишиларни йўқлаш ҳамда баскетбол (волейбол, футбол) ўйнаш карантин даврида хавфли экани кўрсатиб ўтилган. Ўртача хавф даражасида экани қайд этилган.
5-ўринда кинотеатрга бориш, болаларнинг мактаб ёки ёзги оромгоҳларга бориши, умумий офисда ишлаш, сартарошхоналарга бориш ва спорт майдонларидаги ўйинлар санаб ўтилган. Бу ҳам ҳам ўртача хавф даражасига киради.
4-ўриндаги машғулотлар ва жойлар ҳам ўртача хавф даражасида деб баҳоланган. Сув ҳавзаси, яъни бассейнга бориш, савдо марказларида бўлиш, жамоат ҳожатхоналаридан фойдаланиш, пикникларга бориш ва меҳмонхоналарда бўлиш COVID-19 юқтириб олиш эҳтимолини оширади.
3 дан 1-ўрингача бўлган машғулотлар ва масканлар хавф энг кам бўлган ҳолатлар ҳудуди сифатида кўрсатилган. Бунга меҳмонга, шифокор қабулига бориш, уйдан ташқарида овқатланиш, супермаркетдан харид қилиш, чўмилиш ҳавзаларида дам олиш, одамлар кўп бўлган кўчаларда юриш, ўсмирлар учун ўйинлар, уйда битта ҳожатхонадан фойдаланиш, АЁҚШ, кемпинг, музей, овқат етказиб бериш хизматларидан фойдаланиш ҳамда очиқ ҳавода спорт билан шуғулланиш кабилар кириши санаб ўтилган.
Аввалроқ ҳаво яхши айланмайдиган бинолар, жамоат транспорти, одамлар узоқ вақт давомида мулоқот қиладиган жойлар ҳамда бар, ресторан ва караоке-клубларда коронавирус билан касалланиш хавфи юқори эканлиги маълум қилинган.
Шунингдек, олимлар бассейн ва сув ҳавзалари орқали коронавирус юқтириб олиш эҳтимолини баҳолагани тўғрисида, вирусни озиқ-овқатлар орқали юқтириб олишдан сақланиш йўллари хусусида хабар берилган.
Эслатиб ўтамиз, дунёнинг 32 мамлакатидан бўлган 239 нафар олим Жаҳон соғлиқни сақлаш ташкилотига мурожаат йўллаб, ундан коронавирус борасидаги тавсияларни қайта кўриб чиқишни талаб қилганди.
Изоҳ (0)