Коронавирус инфекцияси бепуштликка олиб келиши мумкинлиги ҳақида ишончли далиллар йўқ. «РБК»нинг хабар беришича, бу ҳақда Россия соғлиқни сақлаш вазири Михаил Мурашко «Россия 24» телеканали эфирида маълум қилди.
«Бепуштликка олиб келиши ҳақида маълумотлар ҳозирча йўқ. Коронавирус инфекциясига чалиниш пайтида яллиғланиш касалликлари пайдо бўлиши ҳақида алоҳида хабарлар пайдо бўлди», — дейди Михаил Мурашко.
Унинг айтишича, ҳозирда COVID-19’нинг одам репродуктив функциясига таъсир қилиши эҳтимоли бўйича дастлабки тадқиқотлар олиб борилмоқда. Шу билан бирга, ушбу тадқиқот муаллифларининг айримлари бу борадаги материалларини қайта кўриб чиқиш учун тайёрламоқда.
Мурашконинг таъкидлашича, репродуктолог мутахассислар, акушер-гинекологлар ва андрологлар ушбу вазиятнинг ривожланишини диққат билан кузатиб бормоқда. Россия соғлиқни сақлаш вазири, шунингдек, эркаклар аёлларга нисбатан коронавирусни оғирроқ ўтказаётганини билдирган.
Июнь ойи охирида Россия ССВнинг болалар ва ўсмирлар гинекологи бош мутахассиси Елена Уварова коронавирус инфекцияси билан касалланиб чиққан эркаклар бепуштликка дуч келиши мумкинлигини маълум қилган.
Ўзбекистон Соғлиқни сақлаш вазирлиги ҳузуридаги Коронавирусга қарши кураш штаби аъзоси Анвар Алимов ҳам коронавирус хотин-қизларда бепуштлик чақириши эҳтимоли борлигини айтганди.
Изоҳ (0)