Пентагон раҳбари Марк Эспер Афғонистондаги америкалик ҳарбийлар Россия буюртмасига кўра ўлдирилганини исботловчи далилларни кўрмаганини маълум қилди. Бу ҳақда у АҚШ Вакиллар палатасининг қуролли кучлар бўйича қўмитасида ўтказилган эшитувда маълум қилди, деб хабар беради CNN.
Эспернинг сўзларига кўра, у февраль ойида разведкадан Россиянинг «Толибон» ҳаракати жангариларига боғлиқ пул ўтказмалари тўғрисида маълумот олган. Бироқ ҳисоботларда америкалик аскарларнинг ўлдирилиши учун «мукофот» деган сўз ишлатилганини эслай олмаслигини айтган. Пентагон раҳбарияти ушбу маълумотларни ишончсиз деб топган.
Шу билан бирга, Эскпер Москва чиндан ҳам «Толибон» билан ҳамкорлик қилиши ва уларга ёрдам бериши мумкинлигини истисно этмаган.
Эшитувда иштирок этган АҚШ Қуролли кучлари штаб бошлиқлари қўмитаси раиси генерал Марк Милли Российнинг «Афғонистондаги вазият»га «алоқадорлиги»ни маълум қилган.
Унинг сўзларига кўра, Москва Афғонистонда «Ҳаққоний тармоғи» экстремистик гуруҳи ва «Толибон» орқали ҳаракат қилмоқда. Миллининг таъкидлашича, Россия ва бошқа давлатлар — Эрон, Хитой, Покистон — узоқ йиллардан бери ушбу мамлакатдаги вазиятларда иштирок этиб келмоқда.
Эслатиб ўтамиз, июнь охирида The New York Times газетаси Россия ҳарбий разведка бўлинмаси «Толибон» ҳаракатига боғлиқ жангариларга Афғонистондаги халқаро коалиция ҳарбийларини ўлдирганлик учун махфий равишда мукофот таклиф қилгани тўғрисида ёзганди. «Толибон» ҳаракати эса Россия буюртмасига кўра, америкалик ҳарбийларни ўлдиргани тўғрисидаги мақолага раддия бериб, ўзлари бирор-бир разведка органи ёки хориж давлатининг фойдасига боғланмаганини билдирган.
Ўз навбатида Оқ уй АҚШ разведка хизмати президент Дональд Трампга Россиянинг америкалик ҳарбийларнинг ўлдирилиши учун «Толибон»га мукофот таклиф қилгани тўғрисида ҳисобот бермаганини маълум қилган. Шундан сўнг Washington Post газетаси ҳам Афғонистондаги АҚШ ҳарбийлари Россия ва «Толибон»нинг келишуви оқибатида ҳалок бўлгани тўғрисида мақола чоп этганди.
Изоҳ (0)