Хитойнинг Қозоғистондаги элчихонаси ўз сайтида мамлакатда бўлиб турган хитойлик фуқароларни республика ҳудудида пневмониянинг хавфли турини келтириб чиқарадиган янги инфекция тарқалганидан огоҳлантирди, деб хабар бермоқда «Интерфакс».

Элчихонанинг маҳаллий ОАВларга таяниб таъкидлашича, июнь ўрталаридан бошлаб Атирау, Ақтўбе ва Чимкент вилоятларида пневмониянинг ушбу тури билан касалланиш «сезиларли даражада ошди». Шу билан бирга, «янги ва ҳали ўрганилмаган тури»дан ўлим даражаси COVID-19’га қараганда анча юқори эканлиги айтилган.

Шунингдек, элчихона бугунги кунда Қозоғистоннинг юқоридаги вилоятларида қарийб 500 киши касаллангани, уларнинг 30 нафарининг аҳволи оғир деб баҳоланаётганини қайд этган. 2020 йилнинг биринчи ярмида Қозоғистонда 1772 киши пневмониядан вафот этгани, июнь ойининг ўзида 628 киши, шу жумладан, Хитой фуқаролари вафот этгани ва вируснинг ушбу турини ўрганиш ҳали аниқ натижаларни бермагани қўшимча қилинган.

Tengrinews’нинг маълум қилишича, Қозоғистон Соғлиқни сақлаш вазирлиги Хитойнинг бир қатор ОАВларида қайд этилган бундай хабарларни рад этди. «Қозоғистон республикаси Соғлиқни сақлаш вазирлиги ушбу маълумот ҳақиқатга зидлигини расман эълон қилади», — дейилади вазирлик баёнотида.

Аввалроқ Қозоғистоннинг Олмаота шаҳри расмийлари шаҳарда яқин кунларда кузатилаётган ўткир респиратор вирусли инфекциялар (ЎРВИ) ва пневмонияга чалинганлар сони ортганини эпидемия деб қараётгани хабар берилган эди. Олмаота вилояти ҳокими ўринбосари ва вилоят бош санитария врачи пневмониядан вафот этган.

Қозоғистода коронавирусга чалинганлар сони 53 021 кишига етган. Ҳозирга қадар 35 137 киши соғайган, 264 киши вирус қурбонига айланган.

Бутунжаҳон шифокорлар касаба уюшмаси (WMA) собиқ раҳбари Леонид Эйделман касалликнинг иккинчи тўлқинига жиддий тайёргарлик кўриш кераклигини, чунки у вақтда COVID-19 ЎРВИ эпидемияси даврида параллел равишда тарқалиши мумкинлигини айтиб ўтганди.