Ўзбекистон ҳали яна койка-ўринлар ва дори-дармонлар захирасига эга. Бу ҳақда Коронавирусга қарши кураш штаби вакиллари иштирокида ўтказилган брифинг давомида профессор Ҳабибулла Оқилов маълум қилди.

Фото: «Дарё»

8 июль куни ўтказилган брифинг давомида Ҳабибулла Оқилов коронавирус инфекцияси белгисиз ўтаётган беморларнинг уй ва меҳмонхонада даволанишига рухсат берилган бўлса-да, Ўзбекистондаги стационарларда кўйка-ўринлар қолмаганини маълум қилганди.

«Айтган барча гапларим тўғри. Ва мен ўз сўзларимдан тонмайман. Пандемиянинг дастлабки кунларидан ҳукуматимиз ўз вазифасини бажариб келмоқда. Койка-ўринлар, дори воситалари захираси мавжуд. Ҳозирги статистика давом этадиган бўлса, захиралар етмай қолиши мумкинлигини айтмоқчи эдик. Бироқ ҳозирда шароит етарли. Ҳар қанча беморларни қабул қила оламиз, бироқ биз уларнинг сонини камайтиришимиз керак», — дея аниқлик киритади Оқилов.

Брифингда сўзга чиққан Санитария-эпидемиология назорати инспекцияси бош инспектори Нурмат Отабеков мамлакатда бирор касал кўчада қолмаётганини таъкидлаган. У давлатнинг барчани даволашга имконияти борлигини маълум қилган ва аҳолидан вазиятни мураккаблаштирмасликни сўраган.

Аввалроқ Ҳабибулла Оқилов мамлакатда кунига 1000 нафар бемор аниқланадиган бўлса, соғлиқни сақлаш тизими қулашини билдирганди. Шунингдек, соғлиқни сақлаш вазири Алишер Шодмонов Ўзбекистонда коронавирус авж олса, тиббиёт оғир вазиятга тушиб қолиши мумкинлигини айтиб ўтган.

Эслатиб ўтамиз, Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинади. 10 июлдан тўйлар, оилавий ва оммавий тадбирлар тақиқланади, автотранспорт ҳаракати чекланади, буюм бозорлари ва болалар боғчалари ёпилади, халқаро авиақатновлар икки бараварга қисқартирилади.