Андижон вилоятида қуролни сақлаш ва олиб юриш қоидаларини бузган 68 нафар фуқаро маъмурий жавобгарликка тортилди, дея хабар берди «Дарё» мухбири Умиджон Мамарасулов.
Андижон вилоят ички ишлар бошқармаси ахборот хизматининг маълумот беришича, Президентнинг 2020 йил 8 апрелдаги фармони ҳамда Ички ишлар вазирлигининг 2020 йил 25 июндаги кўрсатмасига асосан, фуқароларга тегишли қуролларнинг сақланиши ва улардан фойдаланилиш устидан назоратни кучайтириш, турли нохуш ҳолатларнинг олдини олиш мақсадида «Қурол» махсус профилактика тадбири ўтказилмоқда.
Йил бошидан айни кунга қадар Патруль-пост хизмати ва жамоат тартибини сақлаш бошқармаси назорат лицензиялаш фаолияти ходимлари томонидан овчилар жамияти ишчи-хизматчилари ҳамда жамоатчилик вакилларини жалб қилинган ҳолда вилоятда 1502 та ов қуролига эга шахслар билан профилактик суҳбат ўтказилган.
Текширувлар давомида қуролни сақлаш ва олиб юриш қоидаларини бузган 68 нафар фуқарога нисбатан Маъмурий жавобгарлик тўғрисидаги кодекснинг 221-моддаси (Ўқотар қуролларни рўйхатдан ўтказиш, қайта рўйхатдан ўтказиш муддатларини ёки уларни ҳисобдан ўтказдириб қўйиш қоидаларини бузиш) билан маъмурий баённома расмийлаштирилган. Икки нафар фуқаро эса ўзига тегишли ноқонуний ўқотар қуролларни ихтиёрий равишда ИИБга топширган.
Эслатиб ўтамиз, мазкур модда билан айбланган фуқаролар базавий ҳисоблаш миқдорининг ўндан бир қисмидан иккидан бир қисмигача миқдорда жаримага тортилиши мумкин.