Toyota Land Cruiser Prado Австралияда ўзининг техник қисмига тегишли янгиланишларни амалга оширишга тайёрланмоқда — йўлтанламас кучлироқ двигатель, замонавий мултимедиа тизими ва қатор янги ассистентларга эга бўлади, бироқ GX ва GXL версияларидан механик узатмалар қутиси олиб ташланади, деб хабар беради Motor.
177 от кучига эга тўрт цилиндрли 2,8 литрли турбодизель қуввати 204 от кучига қадар (500 Нм) кўтарилади — Prado ортидан Toyota HiLux пикапи ҳам худди шу каби моторга эга бўлади.
Янгиланган Prado’нинг трансмиссиясидан олти поғонали «автомат» ўрин олади. Австралия бозорида 24 йилдан буён сотувга чиқарилаётган йўлтанламас биринчи бор механик узатмалар қутисисиз сотилади.
Шунингдек, янгиланган Prado’нинг медиакомплекси Apple CarPlay and Android Аuto смартфонлари билан интеграциялашади — салондаги CD-плейер ва аудио «разём»лар олиб ташланади.
Ёрдамчилар рўйхати янгиланган фавқулодда тормозланиш тизими билан тўлдирилади, у пиёдалар ва велосипедчиларни кудуз куни ажрата олиш функциясига эга бўлади. Бундан ташқари, ҳаракат вақтида қаторни ушлаб туриш ва тезликка оид йўл белгиларини таниш тизимлари ўрнатилади.
Car Advice маълумотларига кўра, мазкур Prado август ойида конвейрдан чиқишни бошлайди ва кузга бориб автосалонларда сотилади.
Австралияда июнь ойида Toyota Land Cruiser Prado’га бўлган талаб коронавирус пандемияси сабаб тушиб кетган кўрсаткичлардан сўнг, 16 фоизга ошди. Дилерларнинг сўзларига кўра, австралияликлар мамлакат бўйлаб саёҳат қилиш учун тўлиқ узатмалари автомобилларни кўпроқ харид қилмоқда.
Эслатиб ўтамиз, апрель ойида Toyota Land Cruiser’нинг Хитойда ишлаб чиқарилган «эгизаги» — Hengtian L4600 йўлтанламасининг видеоси пайдо бўлган эди. Хитой нусхасининг салони оригиналидан ҳам ҳашаматли кўринишга эга бўлган.
Изоҳ (0)