Бухоро вилоятининг Бухоро шаҳрида яшовчи 41 ёшли фуқаро Гўзал Бердиева (барча исм-фамилиялар ўзгартирилган) 50 минг сўм эвазига қўшмачилик қилди. Бу ҳақда «Дарё»га вилоят ИИБ ахборот хизмати раҳбари Қувват Ярашов маълум қилди.
Таъкидланишича, Бухоро шаҳрининг Мустақиллик кўчасидаги кўп қаватли уйларнинг бирида вақтинча ижарада яшаб келган Гўзал Бердиева доимий равишда уйига одам чақириб, қўни-қўшниларининг тинчини бузиб келган.
Бухоро шаҳар 3-сон ИИБ профилактика инспекторлари ва ППХ ходими томонидан ўтказилган «Орият» профилактика тадбири давомида аниқланишича, у ижара уйида фуқароларнинг жинсий алоқа қилиши учун шароит яратиб берган. Ва эвазига 50 минг сўм хизмат ҳақи олган.
Мазкур ҳолат юзасидан Гўзал Бердиевага Жиноят кодексининг 131-моддаси (Қўшмачилик қилиш ёки фоҳишахона сақлаш) 2-қисми билан жиноят иши қўзғатилган.
Таъкидлаш лозим, мазкур модда билан айбланган фуқаронинг айби ўз тасдиғини топса, у базавий ҳисоблаш миқдорининг етмиш беш бараваридан юз бараваригача миқдорда жаримага тортилиши ёхуд озодлиги уч йилдан беш йилгача чекланиши ёки уч йилдан беш йилгача озодликдан маҳрум қилиниши мумкин.
Изоҳ (0)