Алиса қизиқарли саёҳати билан ҳаммамизга яхши таниш бўлса керак. Кимгадир китоби, кимгадир мультфильми, яна кимгадир киноси орқали. Бугун, 4 июль куни жаҳон адабиётининг сара намуналаридан бири бўлган «Алисанинг мўъжизалар мамлакатидаги саргузаштлари» асари илк марта нашр этилган кун. «Дарё» сана муносабати билан қизиқарли фактлар ва асар учун ишланган фильм ва мультфильмларнинг фотожамланмаларини тақдим этади.
Китоб болалар адабиётини қайсидир маънода ўзгартира олган ва унга қувноқлик бахш эта олган асар сифатида баҳоланади. Унда болалар мўъжизалар орқали тарбияланади. Муаллифи Чарльз Людвиж Додсон (кўпроқ Льюис Кэрролл номи билан танилган) китоб билан боғлиқ кўплаб саргузаштларни бошидан кечирган ва буларнинг барчасини асар қаҳрамонларининг ҳаёти билан боғлаган.
Кэрролл Оксфорддаги Крайст-Чёрч коллежида математика фанидан дарс берган. Коллеж декани Генри Лидделлнинг қизи эса Алиса эди. Морган кутубхонаси адабий ва тарихий қўлёзмалар куратори ёрдамчиси Кэролин Веганинг айтишига қараганда, коллеж ходимларининг бари кампусда яшаган. Шунинг учун ҳам Кэрролл кўпинча болаларга эртак айтиб беришни ўз зиммасига оларди.
1862 йилнинг ёзида Кэрролл Темза бўйидаги сайр чоғида Алиса Лидделл ва унинг икки нафар синглисига фантастик ҳикояни сўзлаб беради. Бироқ у ҳеч қачон болалар ёзувчиси бўлиш ҳақида ўйлаб ҳам кўрмаган эди. Қизлар Кэрроллдан ҳикояни яна ва яна давом эттиришни талаб қилади. Шу боис у Алисанинг янги саргузаштлари ҳақида ҳикоялар тўқий бошлайди.
Ҳикоялар Алиса Лидделлга жуда ёқиб тушди ва ўқитувчисига уларни қоғозга туширишини сўради. Кэрролл анча вақт ўтиб, «Алисанинг ер тагидаги саргузаштлари» деб номланган қўлёзмани тақдим этди. Буни ёзувчи ўз кундалигида таъкидлаган. Ҳикоялар яхлит бир роман сифатида йиғилгач, Алисага байрам туҳфаси сифатида совға қилинади.
Кэрролл ўз асарини нашрга тайёрлаганда ҳикоялар икки баробар кўпаяди, «Телбанамо шляпачи» ва «Чешир мушуги» ҳақидаги қиссалар қўшилади. «Телбанамо шляпачи» образи асарга болалар қистови билан киритилган.
Мазкур китоб нашр этилишдан ҳеч қачон тўхтамаган. У 176 та тилга таржима қилинган. Асарнинг давоми, яъни «Алисанинг кўзгу ортидаги саргузаштлари» нашр этилганига етти ҳафта ўтмай сотиб тугатилган.
1863 йил баҳор ойида автор китобни қайта ёзиб, ўз дўсти Жорж Макдоналдга таҳрир учун юборади. Янги китобини Рождество байрамига тақдим этади ва 1865 йил 4 июль куни Льюис Кэрролл тахаллуси билан Macmillan and Co британия нашриётида чоп этилади. Асар мисли кўрилмаган муваффақиятга эришди. Китобни биринчи нашри «Льюис Кэрроллдан Алисанинг мўъжизалар мамлакатидаги саргузаштлари» деб номланган бўлиб, унга Жон Тенниел расм чизган. Иккинчи китоби «Алиса ойна ортида» – олти йилдан сўнг 1871 йилда чоп этилди. Икки эртак ҳам бир асрдан ошган бўлса-да, ҳанузгача болаларнинг севимли эртаги бўлиб келмоқда. Алиса Лидделлга совға қилинган қўлёзма Британия кутубхонасида сақланиб келинмоқда.
Асарга ишланган мультфильмдан ташқари 2010 йилда Walt Disney Pictures кинокомпанияси томонидан ишланган «Алиса мўъжизалар мамлакатида» фантастик-саргузашт фильми ҳам томошабинларга тақдим этилди. Картина режиссёри Тим Бёртон бўлиб, унда Жонни Депп, Энн Ҳетуэй, Ҳелена Бонем Картер каби актёрлар бош ролларни ижро этган. Фильм премьераси 5 март 2010 йилда АҚШда бўлиб ўтди. Қуйида фильмга оид фотосуратлар билан танишасиз.
Изоҳ (0)