Франциянинг Тулуза университети олимлари тадқиқот ўтказди ва карантин шаҳарлардаги шовқинли ифлосланиш даражасига қандай таъсир кўрсатганини аниқлади. Маълум бўлишича, карантин вақтида атроф-муҳитнинг шовқин билан ифлосланиши 90 фоизга камайган. Бу ҳақда «Korrespondent.net» хабар берди.
Тадқиқот учун махсус Silient Cities (Шовқинсиз шаҳарлар) лойиҳаси ташкил қилинган. Лойиҳада кўплаб давлатларнинг шаҳарларидаги шовқин даражаси ўрганилган. Тадқиқотда 40 та мамлакатдан 350 нафардан ортиқ кўнгилли қатнашган.
Кўнгиллилар карантин вақтида ўз шаҳридаги энг шовқинли кўчалардан бирида 10 дақиқали аудио ёзган, кейин эса файлни махсус порталга жойлаган.
Олимлар маълумотларни таҳлил қилган ва масалан, Париждаги баъзи туманларда карантин вақтида шовқин даражаси 90 фоизга камайганини аниқлаган.Шовқин даражасининг камайиши автомобиллар ва темир йўл транспорти ҳаракатининг тўлиқ тўхташи натижасида юз берган.
«Жаҳон соғлиқни сақлаш ташкилоти шовқин билан ифлосланишни одам соғлиғи учун ҳаво ифлосланишидан кейин иккинчи ўринда турадиган хавфли омил сифатида белгилаган. Ҳар бешинчи европалик доимий равишда шовқинли ифлосланишга дучор бўлади, бу эса саломатлик, психика ва ҳаёт тарзига жиддий салбий таъсир кўрсатади», — дейилади экспертлар тадқиқотида.
Изоҳ (0)