Бухоро вилоятининг Ромитан туманида Damas’нинг эшак аравага урилиши оқибатида 25 ёшли аёл вафот этди. Бу ҳақда «Дарё»га вилоят ИИБ ЙҲХБ матбуот хизмати раҳбари Улуғбек Шукруллаев маълум қилди.
Таъкидланишича, 2020 йилнинг 29 июнь куни соат 20:30 да Ромитан тумани «Азизон» маҳалла фуқаролар йиғини Сарбистон қишлоғидан ўтган йўлда ҳаракатланиб бораётган Damas катта тезликда йўл четида келаётган эшак аравага урилган. Натижада эшак аравадаги аёл жароҳат олиб, шифохонага ётқизилган. Тез ёрдам кўрсатилишига қарамай 25 ёшли аёл шифохонада вафот этган.
Айни пайтда Damas ҳайдовчисининг хатти-ҳаракати юзасидан тергов-суриштирув ишлари олиб борилмоқда.
Эслатиб ўтамиз, аввалроқ Фарғонада Damas’лар иштирокидаги ЙТҲда ҳайдовчилардан бири вафот этгани, шунингдек, Марғилон шаҳрида ҳам Damas ва пиёда ўртасида содир бўлган ЙТҲ оқибатида фуқаро вафот этгани хабар берилганди. 1 июль куни Сурхондарёда «ВАЗ-2101» Malibu билан тўқнашиб ёниб кетиши натижасида «Жигули» ҳайдовчиси ва йўловчи вафот этган эди. Сергелида 57 ёшли аёл, Шайхонтоҳурда эса 10 ёшли бола ЙТҲ қурбони бўлгани хабар берилганди.
Изоҳ (0)