Андижонда ақли заиф аёлнинг 2 минг доллар пулини қайтармаслик учун уни ўлдирган фуқаро 17 йилга қамалди

Андижон вилоятининг Пахтаобод туманида асаб-руҳий касалликлар шифохонасида рўйхатда турган аёл билан танишиб, яқин муносабатда бўлган ҳамда аёлнинг уй-жойни сотишдан тушган икки минг долларни қайтармаслик учун уни ўлдирган фуқаро 17 йилга қамалди. Бу ҳақда Жиноят ишлари бўйича Андижон вилоят судига таяниб, «Дарё» мухбири Умиджон Мамарасулов хабар берди.

Жиноят ишлари бўйича Андижон вилоят суди судья катта ёрдамчиси Комроншоҳ Расуловнинг айтишича, судланувчи Т.П. 2018 йилнинг февраль ойида Пахтаобод туманида яшовчи ақли заиф аёл Э.Л. билан танишиб, унинг марҳум турмуш ўртоғидан қолган уй-жойини сотишдан тушган икки минг долларни унга қайтармаслик мақсадида 2018 йилнинг сентябрь ойига қадар фуқаро билан яқин муносабатда бўлиб келган.

«Сентябрь ойи охирлари эди. Э.Л. уйимга келиб, ундан олган пулларни қайтариб бермаганим учун ИИБга ёзиб берганини, шу сабабли ИИБ мени чақираётганини айтди. Шунда сўнг у билан бирга айтилган жойга бордик. Борган пайтимизда профилактика инспектори келмаган экан. Уларни бинонинг қарама-қарши томонида 5-10 дақиқа кутдик. Шу пайтда Э.Л.га Андижон шаҳридан ижарага уй топиб беришимни айтдим ва ишонтирдим. Кейин у билан бирга йўловчи машинада Андижон автовокзалига бордик. У ердан микроавтобусга чиқиб, Ёзёвон тумани марказидаги айланма йўлгача келдик. Машинадан тушиб қолгач, айланма йўлдан Қўқон шаҳрига қараб юрувчи асосий йўл бўйлаб, етти-саккиз соат пиёда гаплашиб кетдик. Дам олиш учун йўлнинг ўнг томонида жойлашган қаровсиз қумли жойга ўтдик. Ўтирмоқчи бўлганимизда, у бошидаги рўмолини ечди. Мен ундан рўмолини сўраб олдим ва рўмол билан бўйнидан бўғиб, ўзимга тортдим ва икки-уч дақиқа ушлаб турдим. Ўлганига ишонч ҳосил қилгач, жиноятни яшириш мақсадида бир метр чуқур ковлаб, жасадни ерга кўмиб, уйимга қайтиб келдим», — дейди судланувчи.

Аниқланишича, 2018 йилнинг сентябрида ўлдирилган аёл икки ойдан сўнг қидирувга берилган. Топилмагач, у билан яқин муносабатда бўлган ва бирга яшаган П.Т.дан гумонланиб, аёлнинг ўлими юзасидан жиноят иши қўзғатилган. 2020 йил январь ойида марҳумнинг жасади топилиб, жиноят фош этилгач, П.Т. қамоққа олинган.

2020 йилнинг 29 июнь куни судья Улуғбек Каримов раислигида бўлиб ўтган суд мажлисида П.Т. Жиноят кодексининг 97-моддаси 2-қисми «ж», «и» бандлари (Тамагирлик ниятида ўта шафқатсизлик билан қасддан одам ўлдириш) билан айбли деб топилган ва 17 йилга озодликдан маҳрум қилинган.