Наманган вилоят перинатал марказида 1 июль, чоршанба куни дунёга келган 4 эгизакнинг онаси Мадина Икромовага туғилганлик ҳақидаги гувоҳномалар топширилди. Бу ҳақда «Дарё» мухбири Азизбек Абдувалиев хабар бермоқда.
Чақалоқларга Абдуллохон, Абдураззоқхон, Абдураҳмонхон ва Абдулвоситхон деган исмлар қўйилди. Уларнинг отаси Баҳодир Ҳозилов буни хўжалар авлодидан эканлиги, шу боис бундай исмлар танлангани билан изоҳлади.
— 2018 йилда туғилган ўғлим Рустамхондан 9 ойлигида ажралиб қолгандик. Худойим унинг ўрнига 4 нафар ўғил фарзанд ҳадя қилди. Ҳомиладорлигимнинг олтинчи ҳафтасида шифокорларга кўринганимда уч эгизак деб айтишганди. 11 ҳафталикда эса уларнинг 4 эгизак эканлиги маълум бўлди, — дейди Мадина Икромова.
Чақалоқларнинг онасига перинитал марказда туғилганлик ҳақидаги гувоҳномаларни топширган Наманган шаҳар 1-сонли ФҲДЁ мудираси Нодира Обиддинованинг айтишича, шаҳарда 2020 йилнинг шу кунигача 8 мингдан ортиқ чақалоқ туғилган. Улардан 200 нафардан ортиғи эгизак, 4 нафари уч эгизак. 4 эгизакнинг дунёга келиши эса яқин орада илк бор қайд этилмоқда.
Мавзуга доир: Наманганда тўрт эгизак туғилди. Уларнинг барчаси ўғил
Изоҳ (0)