Ўқитувчиларнинг педагогик юкламасини оптималлаштириш, уларни асосий юкламадан ташқари бошқа ҳисоботлар ва ортиқча қоғозбозлик ишларидан озод қилиш ҳамда педагогиканинг мазмунига кўпроқ вақт ажратишлари мақсадида «Умумий ўрта таълим муассасаларининг педагогик мутахассисликлари бўйича намунавий йиллик иш режасини шакллантириш тартиби тўғрисидаги йўриқнома»га ўзгартириш киритилди, дея хабар беради Халқ таълими вазирлиги.
Бунда, умумтаълим мактабларининг ўқитувчилари томонидан юритиладиган ҳужжатлар сони биттагача (синф журнали, жумладан, электрон равишда kundalik.com тизими орқали) қисқартирилди.
Қайд этилишича, бу ўқитувчиларга асосий эътиборини дарс машғулотларини янада қизиқарли қилиб ўтишга қаратиши учун шароит яратади.
Барча мактабларда фанлар бўйича тақвим мавзуий режаларини бир хиллаштириш мақсадида, эндиликда тақвим мавзуий режалар Республика таълим маркази томонидан тасдиқланади ва ўқув йили олдидан вазирликнинг расмий веб-сайтларига жойлаштирилади.
Юқорида таъкидлаб ўтилган Давлат дастурига мувофиқ ишлаб чиқилиб амалиётга жорий этилиши кутилаётган «Миллий ўқув дастури»нинг асосий компонентлари доирасида барча фанлардан «Ўқитувчи китоби»ни жорий этилиши мактаб ўқитувчиларининг дарс ишланмаси (конспект)нинг ўрнини тўлдиради.
«Эндиликда ўқитувчилар яратилган имкониятлардан унумли фойдаланган ҳолда таълим сифатини оширишга алоҳида эътибор қаратадилар деган умиддамиз», – дейилади вазирлик хабарида.
Шунингдек, босқичма-босқич ўқитувчилар ва мактаб жамоаси фаолияти ҳужжатларни тўлдиришига қараб эмас, балки мактаб битирувчиларининг ҳаётда муваффақиятга эришишлари билан баҳоланишга ўтилиши кўзда тутилган.
Аввалроқ Халқ таълими вазири Шерзод Шерматов мактабларга шароит яратишда кўп масала ҳокимларга боғлиқ эканини айтган эди.
Изоҳ (0)