O‘zbekiston Respublikasi tashqi ishlar vaziri Abdulaziz Kamilov 1-iyul, chorshanba kuni Ukrainaning favqulodda va muxtor elchisi etib tayinlangan Nikolay Doroshenkoni qabul qildi. Bu haqda Tashqi ishlar vazirligi axborot xizmati xabar bergan.
Vazir ishonch yorliqlari nusxalarini qabul qilar ekan, elchini ushbu lavozimga tayinlangani bilan tabrikladi va unga O‘zbekiston hamda Ukraina o‘rtasidagi o‘zaro manfaatli hamkorlikni mustahkamlashdagi faoliyatiga muvaffaqiyat tiladi.
Uchrashuvda turli sohalardagi O‘zbekiston—Ukraina hamkorligining dolzarb masalalari muhokama qilindi. Savdo-iqtisodiy, madaniy-gumanitar, turizm, ta’lim, tibbiyot va boshqa sohalardagi munosabatlarni rivojlantirishga alohida urg‘u berildi.
Uchrashuvda qo‘shma tadbirlar, jumladan, har tomonlama hamkorlik bo‘yicha O‘zbekiston—Ukraina Hukumatlararo komissiyasining navbatdagi majlisini o‘tkazish bo‘yicha takliflar ko‘rib chiqilgan.
Suhbat chog‘ida koronavirus pandemiyasi ikki tomonlama savdo aylanmasi ko‘rsatkichlariga salbiy ta’sir ko‘rsatayotgani qayd etildi. Shu nuqtayi nazardan, O‘zbekiston va Ukraina ishbilarmon doiralari, savdo-sanoat palatalari va hududlari o‘rtasida to‘g‘ridan to‘g‘ri aloqalarni rivojlantirishdan ikki tomon ham manfaatdor ekanligi tasdiqlandi.
Tomonlar qo‘shma ilmiy loyihalarni amalga oshirishga, fan, texnika va innovatsiyalar sohasidagi hamkorlikni faollashtirishga tayyor ekanliklarini ma’lum qildi.
Muzokaralarda tomonlarni qiziqtirgan boshqa masalalar ham muhokama qilindi, deyiladi TIV xabarida.
Nikolay Doroshenko 2020-yil 14-aprelda Ukrainaning O‘zbekistondagi yangi elchisi lavozimiga tayinlangan.
Nikolay Doroshenko Ukraina Tashqi ishlar vazirligi tizimida, Ukraina prezidenti ma’muriyati hamda Milliy xavfsizlik va mudofaa kengashida ishlagan. U Ukrainaning Rossiyadagi elchixonasida elchi maslahatchisi va maxsus topshiriqlar bo‘yicha elchi sifatida faoliyat yuritgan. 2015-yildan 2017-yilgacha u Ukrainaning Qirg‘izistondagi elchisi bo‘lib ishlagan, so‘ngra Ukraina Tashqi ishlar vazirligining markaziy apparatida faoliyat olib borgan.
Ukrainaning O‘zbekistondagi avvalgi elchisi Yuriy Savchenko sakkiz yillik missiyasini 2019-yilning aprel oyida yakunlagan. Shundan beri Ukraina diplomatik vakolatxonasini muvaqqat ishlar vakili Denis Pogrebnoy boshqarib kelgan.
Izoh (0)