Наманган шаҳридаги 25 та маҳалла янги ташкил этилаётган Давлатобод тумани таркибига ўтказилади

Халқ депутатлари Наманган вилоят кенгаши сессиясида Наманган шаҳридаги 25 та маҳалла фуқаролар йиғинини янги ташкил этилаётган Давлатобод тумани таркибига ўтказиш ҳақидаги шаҳар кенгаши қарори тасдиқланди. Бу ҳақда «Дарё» мухбири Азизбек Абдувалиев хабар бермоқда.

Давлатобод тумани Наманган шаҳри таркибида 1995 йилда собиқ Совет тумани негизида қайта ташкил этилган бўлиб, Олий Мажлис Сенатининг 2003 йил 12 декабрдаги қарорига асосан тугатилганди.

Бугунги кунга келиб Наманган шаҳри ҳудуди 18 минг гектарни ташкил этиб, доимий рўйхатда турган 633,2 минг фуқародан ташқари шаҳар ҳудудига бошқа туманлардан келиб яшаётганлар ҳисобига 1 миллион нафардан ортиқ аҳоли яшамоқда. Бу эса вилоят марказини ижтимоий-иқтисодий ривожлантиришда тизимли иш ташкил этиш, бошқарув ҳамда аҳоли учун ижтимоий ва маиший қулайликлар яратишда муаммолар туғдириб келаётганди.

Келгусида Наманган шаҳрини ривожлантириш салоҳиятини янада ошириш, таълим, соғлиқни сақлаш, коммунал хизмат кўрсатиш тизимлари сифатини яхшилаш, янги иш ўринлари яратиш ва аҳолининг камбағал қатламини қисқартириш, жиноятчиликнинг олдини олиш ва ҳудудларда юзага келаётган муаммоларни ўз вақтида ва самарали ҳал қилиш мақсадида Наманган шаҳри таркибида Давлатобод тумани ташкил этилиши белгиланди.

Мазкур лойиҳага асосан, Наманган шаҳри ҳудудидаги умумий майдони 40,5 квадрат километрни эгаллаган жами 25 та маҳалла фуқаролар йиғини янги ташкил этилаётган Давлатобод тумани таркибига ўтказилади. Уларда ҳозир 150 мингга яқин аҳоли истиқомат қилмоқда.

Туман ҳудудида 4 та — «Хонобод», «Орзу», «Юксалиш» ва «Янгиҳаёт» саноат зоналари ташкил этилган. 1,5 мингга яқин саноат корхонаси, жумладан, «Арт софт холдинг», «Наманган тўқимачи» каби йирик тўқимачилик корхоналари фаолият кўрсатиб келмоқда. Улар томонидан ишлаб чиқарилган маҳсулотларнинг шаҳар саноатидаги улуши 35 фоизга тенг.

Сессияда қайд этилишича, Наманган шаҳри таркибида Давлатобод тумани ташкил қилиниши муносабати билан алоҳида дастур ишлаб чиқилади. Натижада туман истиқболли ва муҳим иқтисодий марказга айланади.

Эслатиб ўтамиз, Президент Шавкат Мирзиёев Наманганга ташрифи давомида Наманган шаҳри таркибида Давлатобод туманини қайта ташкил этиш таклифини берганди.