Россиялик мутахассислар Қозоғистонда коронавирус билан курашиш учун «Учта Т» тактикасини жорий қилишни таклиф қилди, дея хабар беради «РБК»
Соғлиқни сақлаш институти директори Лариса Поповичнинг сўзларига кўра, Қозоғистондаги эпидемик чоралар ўзини оқлайди, шунингдек, ўлим сонининг кескин кўпайишини олдини олишнинг бошқа усуллари йўқ.
«Вирус қайталанмаслигига ҳеч ким жавоб беролмайди. Вакцина ва оммавий иммунитет мавжуд бўлмаган ҳолда «Учта Т» стратегиясини амалга ошириш керак. «Учта Т» қуйидаги чораларни ўз ичига олади: Тraffic – чегараларни ёпиш; Теsting – касалликни эрта аниқлаш учун кенг кўламли таҳлил; Тracing – аломатсиз вирус ташувчи ва инфексион занжирни бузиш учун бемор билан алоқада бўлганларни назоратга олиш. Биз ушбу стратегияни амалга оширишни ўргандик», — дейди Лариса Попович.
Олимларнинг айтишича, Қозоғистондаги кескин вазият Россияга таъсир қилмайди. Лекин бу карантин чораларини кучайтирмасликка ҳам асос бўла олмайди.
Эслатиб ўтамиз, 29 июнь куни ўтказилган йиғилишда Қозоғистон президенти Қосим-Жўмарт Тўқаев давлат комиссиясига коронавирус инфекциясининг тарқалиши тезлашгани сабабли мамлакатда жорий йилнинг март ойидан май ойигача амалда бўлган қаттиқ карантинга ўхшаш чораларни ишлаб чиқиш ва уларни жорий қилиш юзасидан таклиф киритишни топширди.
Сўнгги бир ҳафта давомида Қозоғистонда коронавирус инфекцияси билан касалланган 3,5 мингдан ортиқ бемор аниқланди, бу бир ҳафта олдингидан кўра 826 ҳолатга кўпдир. Ҳозирда мамлакатда касаллик қайд қилинганлар умумий сони 21,8 мингдан ошди, шундан 183 киши вафот этди.
Аввалроқ Қозоғистон соғлиқни сақлаш вазири Елжан Биртанов лавозимидан озод қилиниб, унинг ўрнини ўринбосари Алексей Цой эгаллагани ҳақида хабар берилганди. Собиқ вазирда 14 июнь куни коронавирус аниқлангани маълум қилинган эди. Шунингдек, Қозоғистоннинг биринчи президенти Нурсултон Назарбоевда ҳам коронавирус аниқлангани айтилган эди.
Изоҳ (0)