АҚШ ҳукумати Россия Разведка бош бошқармаси ҳисобидан «Толибон» ҳаракатига боғлиқ ҳисоб рақамига амалга оширилган банк ўтказмалари тўғрисидаги маълумотларни қўлга киритди. Бу ҳақда The New York Times ўзининг уч нафар манбасига таяниб, маълум қилди.
Нашрнинг таъкидлашича, бу Россия ҳарбий разведкаси «Толибон»га боғлиқ жангариларга Афғонистондаги халқаро коалиция ҳарбийлари, жумладан, АҚШ ҳарбийларини ўлдириш учун яширин равишда мукофот таклиф қилганининг исботи ҳисобланади.
Қўлга киритилган маълумотлар Разведка бош бошқармаси ва «Толибон» ўртасида воситачиликда гумонланиб қўлга олинган бизнесменларнинг кўрсатмаларини мустаҳкамлашга хизмат қилади. Газетанинг қайд этишича, ушбу маълумотлар АҚШдаги турли махсус хизматлар ўртасидаги келишмовчиликларга барҳам бериши керак.
The Wall Street Journal маълумотларига кўра, бу каби келишмовчилик Миллий хавфсизлик агентлиги (МХА) ва Марказий разведка бошқармаси (МРБ) ўртасида юзага келган. МХА Россия Афғонистондаги ҳарбийларнинг ўлдирилиши учун пул тўлаганига ишонмаётган эди.
Қайд этилишича, тергов иштирокчилари Афғонистонда америкалик ҳарбийларнинг ўлимига олиб келган икки ҳолатга бор диққатини қаратган. Ҳозирча улардан бири ҳақида маълумотлар мавжуд: 2019 йилнинг апрелида Бағром авиабазасида содир бўлган портлаш оқибатида уч нафар денгиз пиёдаси ҳалок бўлган.
Аввалроқ The New York Times газетаси Россия ҳарбий разведка бўлинмаси «Толибон» ҳаракатига боғлиқ жангариларга Афғонистондаги халқаро коалиция ҳарбийларини ўлдирганлик учун махфий равишда мукофот таклиф қилгани тўғрисида ёзганди. «Толибон» ҳаракати эса Россия буюртмасига кўра, америкалик ҳарбийларни ўлдиргани тўғрисидаги мақолага раддия бериб, ўзлари бирор-бир разведка органи ёки хориж давлатининг фойдасига боғланмаганини билдирган.
Ўз навбатида Оқ уй АҚШ разведка хизмати президент Дональд Трампга Россиянинг америкалик ҳарбийларнинг ўлдирилиши учун «Толибон»га мукофот таклиф қилгани тўғрисида ҳисобот бермаганини маълум қилган.
Шундан сўнг Washington Post газетаси ҳам Афғонистондаги АҚШ ҳарбийлари Россия ва «Толибон»нинг келишуви оқибатида ҳалок бўлгани тўғрисида мақола чоп этганди.
Изоҳ (0)