Индонезиянинг катталиги бўйича иккинчи ҳисобланган Сурабая шаҳри мэри Три Рисмахарини коронавирусга қарши курашаётган шифокорлар билан бўлган учрашувда уларнинг олдида тиз чўкиб йиғлади. Мэр шифокорлардан эпидемия вақтида улар дуч келишга мажбур бўлган қийинчиликлар учун кечирим сўраган. Бу ҳақда «РБК» хабар берди.
Рисмахарини Индонезия тиббиёт уюшмаси ҳамда маҳаллий ҳокимият вакиллари билан учрашган. Учрашув вақтида Сурабая шаҳридаги Соетомо касалхонаси пульмонологи тиббий муассаса COVID-19 беморлари билан тўлганини айтган. Шифокор шаҳар аҳолисининг кам қисми эҳтиёт чораларини кўраётгани сабабли касаллик тарқалишда давом этаётганини билдирган.
Шундан сўнг Три Рисмахарини ўрнидан туриб, залга чиққан ва тиз чўккан. «Илтимос, бизни айбламанг», — деган шаҳар мери.
Шаҳар мэрининг таъкидлашича, унинг идораси касалхоналарга ёрдам кўрсатишга уринган, бироқ бу жараёнда қийинчиликларга дуч келган. У бу вазият бўйича тафсилотларни баён қилмаган.
Сурабая шаҳри жойлашган Шарқий Ява провинцияси мамлакатда коронавирус тарқалиши марказига айланган. 29 июнь ҳолатига кўра, провинцияда 11,5 мингта бемор қайд этилган. Бу мамлакат пойтахти Жакартада қайд этилганидан кўпроқ ҳисобланади, пойтахтда шу пайтгача 11,1 мингта касалланиш ҳолати қайд этилган.
Мавзуга доир: ЖССТ раҳбари коронавирус пандемияси тугамаётгани, аксинча тезлашаётганини маълум қилди
Шунга қарамасдан, Индонезияда июнь ойининг бошида чекловларни қисман олиб ташлаш бошланган. Олимларнинг огоҳлантиришича, бу касаллик тарқалишининг кескин ошишига олиб келиши мумкин. «Биринчи тўлқин ҳали тугамади. Агар профилактика чоралари босқичма-босқич ва тўғри бажарилмаса, биз касалликнинг жуда катта чўққисига дуч келишимиз мумкин», — дея маълум қилган Индонезия университети эпидемиологи Айван Ариаван.
Изоҳ (0)