Россияда коронавирусга чалинганлар сони 650 мингга яқинлашди

Россияда сўнгги бир сутка ичида COVID-19 билан касалланиш бўйича 6693 та ҳолат қайд этилди, деб хабар бермоқда Meduza коронавирусга қарши кураш тезкор штабнинг 30 июнь куни берган маълумотига таяниб.

Бир кун аввал сутка давомида 6719 киши коронавирусга чалингани хабар қилганди. Мамлакатда умумий ҳисобда 647 849 кишида коронавирус қайд этилган.

Касалланганлар сони бўйича Москва шаҳри (745 киши), Москва вилояти (301 киши), Ханти-Мансиск автоном округи (279 киши) етакчилик қилмоқда.

Россияда коронавирус оқибатида вафот этган беморларнинг умумий сони 9320 кишига етди, сўнгги бир сутка ичида 154 киши касаллик қурбонига айланди. Тузалганларнинг умумий сони эса 412 650 кишини ташкил қилмоқда, сўнгги суткада беморларнинг 9220 нафари соғайган.

Мамлакатда коронавирусни аниқлаш бўйича сутка давомида 228 мингта, умумий ҳисобда эса 19,5 миллионта тест ўтказилган.

Россияда кунлик аниқланаётган янги касалланиш ҳолатлари сонининг камаяётгани кузатилмоқда. Хусусан, 29 июнь куни 6719 кишида, 27 июнда 6 852 кишида, 25 июнда эса 7176 кишида вирус қайд этилган.

Аввалроқ ЖССТ раҳбари аксарият давлатлар маълум бир ютуқларга эришган бўлса-да, коронавирус пандемияси тугамаётгани, аксинча тезлашаётганини айтгани хабар берилган эди.