Европанинг шимолий қисмида аниқланган жуда кам миқдордаги радиоактив моддалар инсон соғлиғи ва атроф-муҳитга зарар етказмайди. Бу ҳақда Халқаро атом энергияси агентлиги (МАГАТЭ) хабар берди.
«МАГАТЭга маълум қилинган концентрация даражаси жуда паст бўлиб, инсон соғлиғи ва атроф-муҳитга хавф туғдирмайди», — дейди агентлик бош директори Рафаэл Мариано Гросси.
Аввалроқ МАГАТЭ бир қатор мамлакатларнинг тегишли тузилмалари билан боғланиб, улардан радиоактив моддалар миқдорининг ошиши ўз ҳудудларидаги бирор ҳодиса оқибатида юзага келган ёки келмагани тўғрисида сўров юборганди.
29 июнь ҳолатига кўра, МАГАТЭга аъзо-давлатлар изотопларнинг ортишига алоқадор эмасликларини билдирган. Шунингдек, МАГАТЭ боғланмаган бир қатор давлатлар ҳам ўз ҳудудида концентрация моддаларининг ошишига олиб келадиган ҳеч нарса содир бўлмагани тўғриси маълумот берган.
Эслатиб ўтамиз, июнь ойида Европанинг Россия билан чегарадош шимолий қисмида радиоактив моддалар даражаси ошиб кетгани аниқланган. Норвегия, Финляндия ва Швеция радиацион мониторинг датчиклари радиоактив моддалар даражаси бироз ошганини қайд этган. Бироқ «Росгидромет» Болтиқ денгизи ҳудудида радиоактив моддалар даражаси ошгани қайд этилмаганини маълум қилган. Уларнинг таъкидлашича, денгиздаги станцияларда гамма-нурланиш миқдори нормада. «Росэнергоатом» эса июнь ойида Ленинград ва Кола АЭСларида бирорта ҳолат қайд этилмаганини, станциялардан чиқаётган изотопларнинг умумий миқдори назорат қийматидан ошмаганини билдирган.
Изоҳ (0)