АҚШнинг Арканзас штатида 1990 йилда ишлаб чиқарилган қизил рангли Ford Mustang кабриолети 35 минг долларга сотилди. Ушбу маблағга янги спорткар харид қилиш мумкин эди, деб хабар беради Motor.
30 йил олдин ишлаб чиқарилган Ford Mustang нархининг қимматлиги автомобиль ажойиб ҳолатда сақлаб қолингани билан изоҳланмоқда. Сотувчининг сўзларига кўра, машина шу вақтга қадар гаражда сақланган. Mustang’нинг ҳеч ери зангламаган, том қисми очилади, барча агрегатлари ишлайди. Кабриолет салони оқ чарм билан қопланган бўлиб, худди янгидек турибди.
Мазкур модель ҳозирга қадар 2092 километр йўл босган. Ford Mustang’нинг учинчи авлоди 1979 йилдан 1993 йилга қадар ишлаб чиқарилган. Автомобильга 230 от кучи ва 400 Нм айланувчи моментга эга 5,0 литрли V8 двигатели ўрнатилган. Агрегат беш поғонали механик узатмалар қутиси ёрдамида бошқарилади.
Айни вақтда АҚШда янги Ford Mustang кабриолетини 32 170 долларга харид қилиш мумкин. Автомобильга 210 от кучига эга 2,3 литрли EcoBoost двигатели ўрнатилган.
Изоҳ (0)