Тошкентлик тадбиркор пойтахт такси хизмати учун Хитойдан 500 та электромобил сотиб олди (видео)

Тошкентда такси хизмати учун Хитойдан 500 та BAIC электомобиллари сотиб олинди, деб хабар беради пойтахт ҳокимлиги матбуот хизмати.

Маълумотларга кўра, бунинг учун тошкентлик тадбиркор томонидан 500 та электр токидан қувват олиб ҳаракатланувчи автомобиль харид қилинган. Экологик тоза ва ҳамёнбоп транспорт воситаси бир марта қувватланиш орқали 450 километр масофани босиб ўтишга қодир.

«Трассага чиқса, 540 километр юра олади. 16 минг сўмга 400 километр юрадиган бўлса, бу бир километр 50-60 сўмга тўғри келади дегани. Машинага 53 киловаттли аккумулятор ўрнатилган бўлиб, унга 8 йил кафолати бор, бирор нима бўлса завод уни алмаштириб беради», — дейилади хабарда.

Таъкидланишича, бу турдаги электромобилларни Ўзбекистонга олиб кириш учун 15 фоиз ҚҚС мавжуд.

Ҳар бир электромобилнинг ўз қувватлантиргичи бўлиб, у 19 соатда машинани қувватлантиради. Бироқ таксилар учун махсус станциялар олиб келинади, улар машинани 30 дақиқада қувватлантира олади.

Эслатиб ўтамиз, 2019 йилнинг сентябридан бошлаб Беларуснинг Vitovt Electro E420 электробуси Тошкент кўчалари бўйлаб қатнай бошлаганди. Мазкур транспорт воситаси 450 минг долларга харид қилинган эди. Шу йилнинг март ойида эса Хитойнинг Yutong электробуси пойтахтда ҳаракатлана бошлагани маълум бўлганди.