Бугун Тошкент шаҳрининг Сергели туманидаги заводда жами 626 килограмм 981 грамм гиёҳвандлик воситалари ёқиб юборилди. Бу ҳақда «Дарё» мухбири хабар берди.
Айни тадбир 26 июнь – Халқаро гиёҳвандликка ва гиёҳвандлик воситаларининг ноқонуний айланишига қарши кураш куни муносабати билан ҳуқуқни муҳофаза қилиш органлари томонидан ноқонуний муомаладан олинган гиёҳвандлик воситаларини йўқ қилиш чоралари доирасида ташкил этилди.
Йўқ қилинган гиёҳвандлик воситаларининг 4 килограмм 96 граммини героин, 127 килограмм 154 грамм опий, 25 килограмм 426 грамм гашиш, 266 килограмм 35 грамм марихуана, 105 килограмм 511 грамм кўкнор, 97 килограмм 209 грамм каннабис, 1 килограмм 543 грамм синтетик наркотик воситалари ташкил этди.
Мавзуга доир: Қорақалпоғистонда қарийб 10 минг дона «Трамадол» олиб кетаётган шахслар ДХХ томонидан қўлга олинди
2019 йилда 1 тонна 200 килограмм гиёҳванд моддалар: героин — 40,9 килограмм, опий — 224,6 килограмм, гашиш — 111,6 килограмм, марихуана — 736,4 килограмм, кўкнор — 62,9 килограмм, трамадол ва бошқа дори воситалари — 23,8 килограмм, шунингдек 194,1 грамм янги психофаол моддаларнинг ноқонуний айланмасига чек қўйилгани айтилди.
Бундан ташқари, ноқонуний айланишдан психотроп моддалар — 532 грамм ва 62858 дона таблеткалар, 737,24 грамм ва 30 литр прекурсорлар мусодара қилинган.
2019 йилда гиёҳванд моддаларнинг ноқонуний айланмаси билан боғлиқ жиноятларни содир этгани учун 108 нафар чет эл фуқароси (Афғонистон, Тожикистон, Россия, Туркия, Қозоғистон, Қирғизистон) қўлга олинди. Улардан 129,6 килограмм гиёҳванд моддалар олиб қўйилган.
Афғонистонда гиёҳванд моддаларни ишлаб чиқариш Ўзбекистондаги нарковазиятга таъсир кўрсатган асосий омил бўлиб қолмоқда. Биргина 2019 йилда ушбу мамлакатда гиёҳванд моддалар сақловчи ўсимликлар экилган майдон 240 минг гектар, ишлаб чиқарилган опий миқдори эса 6,4 минг тоннани ташкил этгани билдирилди.
Изоҳ (0)