Bugun Toshkent shahrining Sergeli tumanidagi zavodda jami 626 kilogramm 981 gramm giyohvandlik vositalari yoqib yuborildi. Bu haqda “Daryo” muxbiri xabar berdi.
Ayni tadbir 26-iyun – Xalqaro giyohvandlikka va giyohvandlik vositalarining noqonuniy aylanishiga qarshi kurash kuni munosabati bilan huquqni muhofaza qilish organlari tomonidan noqonuniy muomaladan olingan giyohvandlik vositalarini yo‘q qilish choralari doirasida tashkil etildi.
Yo‘q qilingan giyohvandlik vositalarining 4 kilogramm 96 grammini geroin, 127 kilogramm 154 gramm opiy, 25 kilogramm 426 gramm gashish, 266 kilogramm 35 gramm marixuana, 105 kilogramm 511 gramm ko‘knor, 97 kilogramm 209 gramm kannabis, 1 kilogramm 543 gramm sintetik narkotik vositalari tashkil etdi.
Mavzuga doir: Qoraqalpog‘istonda qariyb 10 ming dona “Tramadol” olib ketayotgan shaxslar DXX tomonidan qo‘lga olindi
2019-yilda 1 tonna 200 kilogramm giyohvand moddalar: geroin — 40,9 kilogramm, opiy — 224,6 kilogramm, gashish — 111,6 kilogramm, marixuana — 736,4 kilogramm, ko‘knor — 62,9 kilogramm, tramadol va boshqa dori vositalari — 23,8 kilogramm, shuningdek 194,1 gramm yangi psixofaol moddalarning noqonuniy aylanmasiga chek qo‘yilgani aytildi.
Bundan tashqari, noqonuniy aylanishdan psixotrop moddalar — 532 gramm va 62858 dona tabletkalar, 737,24 gramm va 30 litr prekursorlar musodara qilingan.
2019-yilda giyohvand moddalarning noqonuniy aylanmasi bilan bog‘liq jinoyatlarni sodir etgani uchun 108 nafar chet el fuqarosi (Afg‘oniston, Tojikiston, Rossiya, Turkiya, Qozog‘iston, Qirg‘iziston) qo‘lga olindi. Ulardan 129,6 kilogramm giyohvand moddalar olib qo‘yilgan.
Afg‘onistonda giyohvand moddalarni ishlab chiqarish O‘zbekistondagi narkovaziyatga ta’sir ko‘rsatgan asosiy omil bo‘lib qolmoqda. Birgina 2019-yilda ushbu mamlakatda giyohvand moddalar saqlovchi o‘simliklar ekilgan maydon 240 ming gektar, ishlab chiqarilgan opiy miqdori esa 6,4 ming tonnani tashkil etgani bildirildi.
Mavzuga doir:
Izoh (0)